High Cholesterol: కండ్ల నుంచి కాళ్ల వరకు.. కొలెస్ట్రాల్ పెరిగితే శరీరం ఇచ్చే సంకేతాలివే!

High Cholesterol: అధిక కొలెస్ట్రాల్ నేడు ప్రపంచ వ్యాప్తంగా మిలియన్ల మందిని వేధిస్తున్న ప్రధాన ఆరోగ్య సమస్య. రక్తంలో చెడు కొలెస్ట్రాల్ పెరిగినప్పుడు అది ధమనులలో పేరుకుపోయి గుండెపోటు, స్ట్రోక్ ప్రమాదాన్ని పెంచుతుంది. సాధారణంగా బ్లడ్ టెస్ట్ ద్వారానే దీనిని గుర్తిస్తారు. కానీ మన కళ్లు, చర్మం , కాళ్లలో కనిపించే కొన్ని అసాధారణ మార్పులు కొలెస్ట్రాల్ స్థాయిలు ప్రమాదకరంగా ఉన్నాయని సూచిస్తాయి. ఈ హెచ్చరిక సంకేతాలను ముందుగానే.. గుర్తించడం వల్ల ప్రాణాపాయం నుంచి తప్పించుకోవచ్చు.

కొలెస్ట్రాల్ సంకేతాలు:
కొలెస్ట్రాల్ పెరిగినప్పుడు శరీరం అంతర్గతంగా మాత్రమే కాకుండా బాహ్యంగా కూడా కొన్ని సంకేతాలను ఇస్తుంది. ఆ సంకేతాలు ఏ భాగాలలో ఎలా కనిపిస్తాయో ఇప్పుడు చూద్దాం.

1. కళ్లలో మార్పులు:
కళ్లు కొలెస్ట్రాల్ గురించి చాలా విషయాలు చెబుతాయి. ముఖ్యంగా కనురెప్పల పైన లేదా కళ్ల మూలల్లో పసుపు రంగులో చిన్న చిన్న గడ్డలు లేదా మచ్చలు కనిపిస్తే వాటిని ‘క్సాంతెలాస్మా’ అంటారు. ఇవి చర్మం కింద కొలెస్ట్రాల్ పేరుకుపోవడం వల్ల ఏర్పడతాయి. అలాగే.. కంటి నల్లపాప చుట్టూ తెల్లటి లేదా బూడిద రంగు వలయం కనిపిస్తే.. అది రక్తంలో కొవ్వు అధికంగా ఉందనడానికి బలమైన సంకేతం.

2. కాళ్లు, చీలమండలు:
ధమనులలో కొవ్వు పేరుకుపోవడం వల్ల కాళ్లకు రక్త ప్రసరణ తగ్గుతుంది. దీనిని పెరిఫెరల్ ఆర్టరీ డిసీజ్ అంటారు. దీని వల్ల నడుస్తున్నప్పుడు కాళ్లలో విపరీతమైన నొప్పి రావడం, చీలమండల దగ్గర వాపు రావడం జరుగుతుంది. కాళ్లలోని కండరాలు బలహీనపడటం, కాళ్లు ఎప్పుడూ చల్లగా ఉండటం లేదా కాళ్లపై జుట్టు రాలిపోవడం వంటివి కూడా కొలెస్ట్రాల్ పెరిగిందని చెప్పే సంకేతాలే.

3. చర్మంపై పసుపు గడ్డలు:
శరీరంలోని వివిధ భాగాలలో.. ముఖ్యంగా మోచేతులు, మోకాళ్లు లేదా అరచేతుల వెనక భాగంలో చిన్న చిన్న పసుపు లేదా నారింజ రంగు గడ్డలు కనిపిస్తే వాటిని ‘క్సాంతోమాస్’ అంటారు. ఇవి నేరుగా రక్తంలోని అధిక ట్రైగ్లిజరైడ్స్ లేదా కొలెస్ట్రాల్‌తో ముడిపడి ఉంటాయి.

4. చేతులు, పాదాలలో తిమ్మిర్లు:
రక్తనాళాల్లో కొవ్వు అడ్డంకులు ఏర్పడినప్పుడు.. నాడీ వ్యవస్థకు అందాల్సిన ఆక్సిజన్ , రక్తం సరిగ్గా అందవు. దీని వల్ల చేతులు, పాదాలలో తరచుగా తిమ్మిర్లు రావడం, సూదులతో గుచ్చినట్లు అనిపించడం వంటివి జరుగుతాయి.

Also Read: సమ్మర్‌ బెస్ట్ డ్రింక్స్.. రుచికి రుచి ఆరోగ్యానికి ఆరోగ్యం

5. గోళ్ల రంగు మారడం:
కాళ్లకు రక్త ప్రసరణ సరిగ్గా అందనప్పుడు, కాలి గోళ్లు పసుపు రంగులోకి మారడం లేదా పెళుసుగా తయారై విరిగిపోవడం జరుగుతుంది. గోళ్ల పెరుగుదల నెమ్మదించడం కూడా గమనించవచ్చు.

నివారణ మార్గాలివే:
అధిక కొలెస్ట్రాల్‌ను నియంత్రించాలంటే.. కేవలం మందులే కాకుండా లైఫ్ స్టైల్ మార్పులు చాలా ముఖ్యం.

ఆహారం: పీచు పదార్థం అధికంగా ఉండే ఓట్స్, నట్స్, ఆకుకూరలు తీసుకోవాలి. సాచురేటెడ్ ఫ్యాట్స్ (నూనెలు, వెన్న) తగ్గించాలి.

వ్యాయామం: ప్రతి రోజూ కనీసం 30-40 నిమిషాల వాకింగ్ లేదా వ్యాయామం చెడు కొలెస్ట్రాల్‌ను తగ్గించి, మంచి కొలెస్ట్రాల్‌ను పెంచుతుంది.

పరీక్షలు: 30 ఏళ్లు దాటిన వారు ఏటా ‘లిపిడ్ ప్రొఫైల్’ పరీక్ష చేయించుకోవడం మంచిది.

Join WhatsApp Channel

Share

• 
• 
• 
• 
• 
•