చుండ్రు సమస్యకు చెక్ పెట్టండి.. వేపతో అద్భుతమైన హెయిర్ ప్యాక్‌లు!

Neem hair pack for dandruff: నేటి కాలంలో కాలుష్యం, జుట్టు సరిగ్గా శుభ్రం చేసుకోకపోవడం, మానసిక ఒత్తిడి కారణంగా చాలా మందిని వేధిస్తున్న ప్రధాన సమస్య ‘చుండ్రు’. ఇది కేవలం దురదనే కాకుండా.. జుట్టు రాలడానికి, చర్మ సంబంధిత అలర్జీలకు దారి తీస్తుంది. మార్కెట్లో దొరికే.. యాంటీ-డాండ్రఫ్ షాంపూలు తాత్కాలికంగా పనిచేసినా, అందులోని కెమికల్స్ జుట్టును దెబ్బ తీస్తాయి. ఇలాంటి సమయంలో ప్రకృతి మనకు ప్రసాదించిన ‘వేప’ ఒక శక్తి వంతమైన యాంటీ-సెప్టిక్ , యాంటీ-ఫంగల్ ఏజెంట్‌గా పనిచేసి చుండ్రును వేళ్ళతో సహా తొలగిస్తుంది.

చుండ్రు కోసం వేప ప్యాక్‌లు – పూర్తి సమాచారం:
వేపలో ఉండే ‘నింబిడిన్’ , ‘అజాడిరాక్టిన్’ వంటి మూలకాలు శిలీంధ్ర వ్యాధులపై పోరాడి తల చర్మాన్ని ఆరోగ్యంగా ఉంచుతాయి. చుండ్రు నివారణకు వేపను రకరకాలుగా ఎలా ఉపయోగించవచ్చో ఇప్పుడు చూద్దాం.

1. వేప, పెరుగు ప్యాక్:
పెరుగులో ఉండే ఫ్యాటీ యాసిడ్స్ తల చర్మానికి తేమను ఇస్తాయి. వేప ఇన్ఫెక్షన్‌ను తగ్గిస్తుంది.

తయారీ: ఒక కప్పు వేపాకులను మెత్తని పేస్ట్‌లా చేసి.. అందులో రెండు స్పూన్ల పెరుగు కలపండి.

వాడే విధానం: ఈ మిశ్రమాన్ని తలకు పట్టించి 30 నిమిషాల తర్వాత గోరు వెచ్చని నీటితో కడిగేయండి. ఇది చుండ్రును తగ్గించడమే.. కాకుండా జుట్టును మృదువుగా చేస్తుంది.

2. వేప, నిమ్మరసం:
నిమ్మరసంలోని విటమిన్ సి, అసిడిక్ స్వభావం చుండ్రు పొరలను తొలగిస్తాయి.

తయారీ: వేప పొడి లేదా పేస్ట్‌లో అర చెక్క నిమ్మరసం కలపండి.

ప్రయోజనం: ఇది తలలో వచ్చే దురదను తక్షణమే తగ్గిస్తుంది. వారానికి ఒక్కసారి వాడితే.. మంచి ఫలితం ఉంటుంది.

3. వేప, కొబ్బరి నూనె:
పొడి చర్మం వల్ల వచ్చే చుండ్రుకు ఇది దివ్యౌషధం.

తయారీ: కొబ్బరి నూనెను వేడి చేసి అందులో కొన్ని వేపాకులు వేసి మరిగించండి. నూనె ఆకుపచ్చ రంగులోకి.. మారాక వడగట్టండి.

వాడే విధానం: ఈ నూనెతో తలకు మసాజ్ చేయడం వల్ల రక్త ప్రసరణ మెరుగుపడి.. ఫంగల్ ఇన్ఫెక్షన్లు దరిచేరవు.

4. వేప నీటితో శుభ్రం చేయడం:
ప్యాక్ వేసుకోవడానికి సమయం లేని వారికి ఇది సులభమైన పద్ధతి.

పద్ధతి: లీటరు నీటిలో గుప్పెడు వేపాకులు వేసి సగం అయ్యే వరకు మరిగించండి. ఆ నీటిని చల్లార్చి, షాంపూ చేసుకున్న తర్వాత చివరిగా ఆ నీటితో తలను శుభ్రం చేసుకోండి.

లాభం: ఇది తల చర్మంపై రక్షణ కవచంలా పని చేస్తుంది.

5. వేప, మెంతుల ప్యాక్ :
మెంతులు జుట్టు రాలడాన్ని అరికడతాయి.

తయారీ: రాత్రంతా నానబెట్టిన మెంతులను, వేపాకులతో కలిపి మెత్తగా రుబ్బాలి.

ప్రయోజనం: ఈ ప్యాక్ వేసుకోవడం వల్ల జుట్టు కుదుళ్లు బలపడి. చుండ్రు పూర్తిగా మాయమవుతుంది.