Puffy Face: తరచు మొహం ఉబ్బిపోయినట్టుగా అనిపిస్తోందా? కారణం అదే కావచ్చు..!

Puffy Face: మొహం ఉబ్బిపోయినట్టు అనిపించడం చాలామందికి తెలిసిన సమస్య. ఉదయం లేచినప్పుడు మొహం కాస్త వాచినట్టు, బరువుగా కనిపిస్తే మొహం ఉబ్బిపోయిందని అర్థం. ఇది చిన్న విషయం అయినా, కొన్ని సందర్భాల్లో ఆరోగ్య సమస్యల సంకేతం కావచ్చు. అసలు ఈ సమస్య ఎందుకు వస్తుంది. దీన్ని ఎలా తగ్గించుకోవచ్చో ఇప్పుడు తెలుసుకుందాం.

సాధారణ కారణాలు
మొహం ఉబ్బడానికి చాలా కారణాలు ఉంటాయని ఆరోగ్య నిపుణులు చెబుతున్నారు. రాత్రి ఉప్పు ఎక్కువగా ఉన్న ఆహారం తిన్నారా? అలాంటప్పుడు శరీరంలో నీరు ఎక్కువగా నిలిచిపోతుంది. దీనివల్ల ఉదయం మొహం ఉబ్బినట్టు కనిపిస్తుంది. చిప్స్, నూడుల్స్ లాంటివి ఎక్కువ తిన్న తర్వాత ఈ సమస్య రావొచ్చని డాక్టర్లు చెబుతున్నారు.

కొన్ని ఆహారాలు, లేదా కొత్తగా వాడిన క్రీమ్‌ల వల్ల అలెర్జీ వస్తుందట. ఇలాంటప్పుడు మొహం వాచిపోవచ్చని నిపుణులు చెబుతున్నారు. కొత్త ఫేస్‌వాష్ లేదా మేకప్ వాడిన తర్వాత మొహం ఉబ్బినట్టు అనిపిస్తే, అది అలెర్జీ కావొచ్చని అంటున్నారు.

నిద్రలేమి కారణంగా కూడా మొహం ఉబ్బిపోయే అవకాశం ఉందని ఆరోగ్య నిపుణులు చెబుతున్నారు. రాత్రంతా సినిమాలు చూసి, ఆలస్యంగా పడుకున్నారా? తగినంత నిద్ర లేకపోతే రక్తం సరిగ్గా సర్క్యులేట్ కాదు. దీనివల్ల మొహం కొంచెం ఉబ్బినట్టు కనిపిస్తుంది. ఇది చాలామందికి సర్వసాధారణం.

మహిళల్లో రుతుస్రావం సమయంలో, గర్భం ఉన్నప్పుడు లేదా హార్మోన్లలో మార్పుల వల్ల శరీరంలో నీరు నిలిచిపోతుందని డాక్టర్లు చెబుతున్నారు. ఇది మొహం వాచిపోయేలా చేస్తుందట.

వీటిని లైట్ తీసుకోవద్దు
కొన్నిసార్లు మొహం ఉబ్బడం అంత సాధారణం కాదని డాక్టర్లు చెబుతున్నారు. ఇది పెద్ద ఆరోగ్య సమస్యల సూచన కావచ్చని అంటున్నారు. మూత్రపిండాలు సరిగా పని చేయకపోతే, శరీరంలో నీరు బయటకు పోకుండా నిలిచిపోతుందట. దీనివల్ల మొహం, కాళ్లు, చేతులు వాచిపోతాయని డాక్టర్లు చెబుతున్నారు. ఇలాంటి లక్షణాలు కనిపిస్తే వెంటనే డాక్టర్‌ని కలవడం మంచిది.

హైపోథైరాయిడిజం అనే సమస్య ఉంటే, శరీరంలో ద్రవాలు నిలిచిపోతాయని ఆరోగ్య నిపుణులు చెబుతున్నారు. దీనివల్ల మొహం ఉబ్బడంతో పాటు బరువు పెరగడం, అలసట లాంటి సమస్యలూ వస్తాయట. ఇలాంటప్పుడు థైరాయిడ్ టెస్ట్ చేయించుకోవాలని నిపుణులు చెబుతున్నారు.

పళ్లలో ఇన్ఫెక్షన్ లేదా సైనస్ సమస్యల వల్ల కూడా మొహం వాచిపోవచ్చని ఆరోగ్య నిపుణులు చెబుతున్నారు. ఇలాంటప్పుడు సాధారణంగా నొప్పి కూడా ఉంటుంది. దంతాల్లో చీము ఉంటే మొహం ఒకవైపు వాచిపోవచ్చట.

ఎలా తగ్గించుకోవచ్చు?
మొహం ఉబ్బడాన్ని తగ్గించడానికి కొన్ని సులభమైన చిట్కాలు ఉన్నాయని ఆరోగ్య నిపుణులు చెబుతున్నారు. రోజుకు 2-3 లీటర్ల నీళ్లు తాగితే శరీరంలో నీటి నిల్వ తగ్గుతుందట. ఇది మొహం వాపును తగ్గించడమే కాకుండా డీహైడ్రేషన్ సమస్యను కూడా తొలగిస్తుంది.

ఆహారంలో ఉప్పు తక్కువగా వాడడం మంచిది. వాటికి బదులుగా తాజా పండ్లు, కూరగాయలు ఎక్కువగా తింటే ఉత్తమం. ఇవి శరీరాన్ని ఆరోగ్యంగా ఉంచుతాయని ఆరోగ్య నిపుణులు చెబుతున్నారు.

మొహం ఉబ్బడం కొన్ని రోజులు తగ్గకపోతే, లేదా నొప్పి, ఊపిరి ఆడకపోవడం, ఇతర వింత లక్షణాలు కనిపిస్తే వెంటనే డాక్టర్‌ని సంప్రదించడం మంచిది. కిడ్నీ, థైరాయిడ్ లాంటి సమస్యలను ముందుగానే గుర్తిస్తే ప్రమాదం తప్పుతుంది.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘బిగ్ టీవీ’ ఎటువంటి బాధ్యత వహించవని గమనించగలరు.