ఈ మధ్య చాలా మందిలో ప్రీ-డయాబెటిస్ సమస్య పెరుగుతోంది. అంటే బ్లడ్ షుగర్ సాధారణం కన్నా ఎక్కువ ఉండడం. ఇది పూర్తి డయాబెటిస్ కావడానికి ముందు దశగా చెప్పుకుంటారు. ఈ పరిస్థితిని నిర్లక్ష్యం చేస్తే భవిష్యత్తులో టైప్-2 డయాబెటిస్ వచ్చే అవకాశం ఎక్కువగా ఉంటుందని డాక్టర్లు హెచ్చరిస్తున్నారు. అయితే రోజూ ఉదయం వాకింగ్ చేస్తే షుగర్ తగ్గిపోతుందనే నమ్మకం ఎక్కువ మందిలో ఉంది. దీనికి వైద్యులు ఏం చెబుతున్నారో తెలుసుకోండి.
ఉదయం నడక వల్ల శరీరంలో రక్తప్రసరణ బాగా జరుగుతుంది. దాంతో శరీరం బ్లడ్ షుగర్ను కొంతవరకు ఉపయోగించుకుంటుంది. అలాగే ఇన్సులిన్ పని చేసే విధానం మెరుగవుతుంది. కానీ ఇది తాత్కాలికంగా మాత్రమే ఉపయోగపడుతుంది. ప్రీ-డయాబెటిస్ పూర్తిగా తగ్గాలంటే జీవనశైలిలో మార్పులు తప్పనిసరి అంటున్నారు నిపుణులు.
వీటిని తినకండి
ముఖ్యంగా ఆహార అలవాట్లు మార్చుకోవాలి. తెల్ల బియ్యం, మైదా, తీపి పదార్థాలు, బేకరీ ఐటమ్స్, కూల్ డ్రింక్స్ ఎక్కువగా తీసుకుంటే బ్లడ్ షుగర్ పెరుగుతుంది. వీటికి బదులుగా రాగి, జొన్న, బ్రౌన్ రైస్, కూరగాయలు, పండ్లు, పప్పులు వంటి ఆరోగ్యకరమైన ఆహారం తీసుకోవాలి. ఫైబర్ ఎక్కువగా ఉండే ఆహారం.. షుగర్ నియంత్రణకు చాలా మంచిది.
వాకింగ్తో పాటు ఇతర వ్యాయామాలు కూడా అవసరం. రోజుకు కనీసం 30 నిమిషాలు వాకింగ్ చేయాలి. వారానికి కొన్ని రోజులు యోగా, తేలికపాటి వ్యాయామాలు లేదా శరీర బలం పెంచే వ్యాయామాలు చేయడం మంచిదని డాక్టర్లు సూచిస్తున్నారు. ఇలా చేస్తే శరీరంలో ఉన్న షుగర్ త్వరగా ఖర్చవుతుంది.
నిద్ర పోవాల్సిందే
ఇంకా నిద్ర కూడా చాలా ముఖ్యం. రోజుకు కనీసం 7 నుంచి 8 గంటలు నిద్రపోవాలి. సరైన నిద్ర లేకపోతే ఇన్సులిన్ సరిగ్గా పని చేయదు. దాంతో బ్లడ్ షుగర్ పెరుగుతుంది. అలాగే ఎక్కువ ఒత్తిడి కూడా షుగర్ను పెంచుతుంది. కాబట్టి ఒత్తిడిని తగ్గించుకోవాలి. ధ్యానం, ప్రార్థన, సంగీతం వినడం లాంటి అలవాట్లు మనసుకు ప్రశాంతత ఇస్తాయి.
డాక్టర్లు మరో ముఖ్యమైన విషయం చెబుతున్నారు. భోజనం తర్వాత 10 నుంచి 15 నిమిషాలు నడక చేయడం చాలా మంచిది. ఇలా చేస్తే భోజనం వల్ల పెరిగే షుగర్ నియంత్రణలో ఉంటుంది. అలాగే బరువు తగ్గడం కూడా కీలకం. కొద్దిగా బరువు తగ్గినా శరీరం ఇన్సులిన్ను బాగా ఉపయోగించుకుంటుంది. దాంతో బ్లడ్ షుగర్ స్థాయి తగ్గే అవకాశం ఉంటుంది. మొత్తానికి, ఉదయం వాకింగ్ చేయడం మంచి అలవాటే. కానీ అది ఒక్కటే చేస్తే ప్రీ-డయాబెటిస్ పూర్తిగా తగ్గదు. సరైన ఆహారం, రోజువారీ వ్యాయామం, మంచి నిద్ర, ఒత్తిడి నియంత్రణ… అన్నీ పాటిస్తేనే ప్రీ-డయాబెటిస్ను నియంత్రించుకోవచ్చని వైద్యులు స్పష్టంగా చెబుతున్నారు.
Share
Anil Ravipudi : మా ఇంట్లో నా కొడుకే బూతులు మాట్లాడుతున్నాడు, బుల్లి రాజు పాత్ర పై మరోసారి క్లారిటీ
Netflix Best Horror Movie : దేవుడి గుడిలో వింత శాపం... అంతుచిక్కని చావులు... దడ పుట్టించే థాయ్ హారర్ మూవీ
