varieties of silk sarees: భారతదేశం పట్టు చీరలకు పుట్టినిల్లు. ఇక్కడ ఒక్కో రాష్ట్రానికి ఒక్కో ప్రత్యేకమైన శైలి, నేత విధానం ఉన్నాయి. ప్రధానంగా ప్రసిద్ధి చెందిన కొన్ని రకాల పట్టు చీరల గురించి అలాగే అవి లభించే ప్రాంతాల గురించి ఇప్పుడు తెలుసుకుందాం.
కంచిపట్టు: దీనిని పట్టుచీరల రాణి అంటారు. ఈ పట్టుచీరలు తమిళనాడులోని కంచి అనే పట్టణ కేంద్రంగా తయారవుతాయి. బంగారు జరీ, వెండి పోగులతో ఈ చీరలను నేస్తారు. పెళ్లిళ్లకు కంచి పట్టు చీరలు అత్యంత ప్రసిద్ధి చెందినవి.
బనారసి పట్టు: ఈ చీరలు ఉత్తరప్రదేశ్ లోని వారణాసిలో తయారవుతాయి. ఇవి ముఖ్యంగా మొఘల్ శైలి డిజైన్లలో తయారవుతాయి. వీటిలో పూల తీగలు, బంగారు/వెండి బ్రోకేడ్ వర్క్ వీటి ప్రత్యేకత.
ధర్మవరం పట్టు చీరలు: డబుల్ షేడ్ అంటే రెండు రంగుల మిశ్రమం, అలాగే వెడల్పైన బోర్డర్లకు ఈ చీరలు పెట్టింది పేరు. ఇవి ఆంధ్రప్రదేశ్లోని ధర్మవరం పట్టణ కేంద్రంగా తయారవుతుంటాయి.
పోచంపల్లి (ఇక్కత్) పట్టు చీరలు: ఇవి తెలంగాణలోని నల్గొండ జిల్లాలో ప్రసిద్ది చెందిన పోచంపల్లి ఏరియాలో తయారవుతాయి. టై అండ్ డై పద్ధతిలో రంగులు అద్ది రేఖాగణిత (Geometric) డిజైన్లతో వీటిని నేస్తారు. వీటికి తెలంగాణతో పాటు ఆంధ్రప్రదేశ్లోనూ మంచి డిమాండ్ ఉంటుంది.
మైసూర్ సిల్క్: కర్ణాటక రాష్ట్రంలో ఈ చీరలు తయారవుతాయి. చాలా మృదువుగా, తేలికగా ఉంటాయి. వీటి తయారిలో స్వచ్ఛమైన పట్టు మరియు బంగారు జరీని ఉపయోగిస్తారు.
గద్వాల్ పట్టు చీరలు: బాడీ కాటన్ లేదా పట్టుతో ఉండి, బోర్డర్ మరియు పల్లు మాత్రం ప్యూర్ పట్టుతో ఉండటం వీటి ప్రత్యేకత. ఇవి తెలంగాణలోని గద్వాల ప్రాంతంలో నేస్తారు.
ఉప్పాడ (జామ్దానీ) పట్టు చీరలు: చేత్తో నేసే అతి సన్నని డిజైన్లు, తక్కువ బరువు ఉండటం వల్ల ఇవి చాలా ప్రాచుర్యం పొందాయి. ఇవి ఆంధ్రప్రదేశ్ రాష్ట్రంలోని కాకినాడ ప్రాంతంలో నేస్తారు.
పైథానీ పట్టు చీరలు: ఈ చీరలు మహారాష్ట్రలో తయారవుతాయి. ఈ చీరల కొంగులపై నెమలి డిజైన్లు, పూల బొమ్మలు చాలా కళాత్మకంగా ఉంటాయి. ఇవి మధ్య భారతంలో చాలా ప్రాచుర్యం పొందిన పట్టు చీరలు.
పటోల పట్టు చీరలు: డబుల్ ఇక్కత్ నేత చీరలు ఇవి. ఈ చీరలు రెండు వైపులా ఒకేలా కనిపిస్తుంటాయి. ఇది చాలా ఖరీదైన పట్టురకం చీరలు. ఇవి గుజరాత్ రాష్ట్రంలో లభ్యమవుతాయి.
ముగా సిల్క్: సహజమైన బంగారు రంగులో మెరిసిపోతూ ఉంటాయి ఈ చీరలు. ఇవి చాలా మన్నికైనవి.. ఇవి అస్సాంలో తయారవుతాయి. తూర్పు భారతంలో వీటికి మంచి డిమాండ్ ఉంటుంది.
నారాయణపేట పట్టు చీరలు: తెలంగాణ ప్రాంతానికి చెందిన ఈ చీరలు చెక్ డిజైన్లు, సరళమైన బోర్డర్లకు ప్రసిద్ధి చెందినవి. ఇవి ఎక్కువగా నారాయణపేట పట్టణంలో తయారవుతాయి.
వెంకటగిరి: ఆంధ్రప్రదేశ్లోని నెల్లూరు జిల్లాకు చెందిన ఈ చీరలు తేలికపాటి నేతకు ప్రసిద్ధి చెందినవి.
చందేరి: మధ్యప్రదేశ్ రాష్ట్రానికి చెందిన ఇవి సిల్క్ మరియు కాటన్ మిశ్రమంతో చాలా పారదర్శకంగా ఉంటాయి.
తుస్సార్ సిల్క్: బీహార్, జార్ఖండ్ ప్రాంతాల్లో లభించే ఈ పట్టు సహజమైన ఆకృతిని (Texture) కలిగి ఉంటుంది.
ముఖ్య గమనిక: పైన తెలిపిన వివరాలు కొందరు నిపుణులు, వివిధ నేతన్నలు చెప్పిన అంశాల ఆధారంగా అందించినవి మాత్రమే. ఇందులో బిగ్ టీవీ సొంతంగా కల్పించి రాసింది ఏమీ లేదని గమనించగలరు.
Share
ఇన్నోవా ఇప్పుడు మరింత చీప్.. ఏకంగా అంత ధర తగ్గిందా?
Heatwave Alert: ఎండలో బయటకు రావొద్దు.. నెత్తిన తలపాగ పెట్టుకోండి.. మంత్రి సీతక్క విజ్ఞప్తి
