Chayote Health Benefits: ప్రస్తుత జనరేషన్ వాళ్లకి సీమ వంకాయలు అంటే అంతగా అవగాహన లేకపోవచ్చు. కానీ ఈ కూరగాయ వల్ల కలిగే ఆరోగ్య ప్రయోజనాలు తెలిస్తే.. ఎక్కడున్నా వెతికి మరీ తినేస్తారు. అంతలా సీమ వంకాయలతో ప్రయోజనాలు చేకూరుతాయి మరి. ఈ కూరగాయ చూసేందుకు అచ్చం జామకాయలను పోలి ఉంటుంది. దీనిలో అనేక పోషకాలు ఉండటం వలన తరచూ డైట్లో చేర్చుకోమని వైద్యులు సూచిస్తున్నారు. ఈ క్రమంలో సీమ వంకాయలతో కలిగే ఆరోగ్య ప్రయోజనాలేంటో చూసేద్దాం రండి.
ఒక కప్పు ఉడకబెట్టిన సీమ వంకాయలను తింటే.. సుమారు 39 క్యాలరీల శక్తి లభిస్తుంది. దీంతోపాటు ఈ కూరగాయ ద్వారా పిండి పదార్థాలు 9 గ్రాములు, ప్రోటీన్లు 2 గ్రాములు, కొవ్వు 0.5 గ్రాములు, ఫైబర్ 4 గ్రాములు లభిస్తాయి. అంతేకాదు.. దీనిలో విటమిన్లు బి9, సి, కె, బి6, మాంగనీస్, కాపర్, జింక్, పొటాషియం, మెగ్నిషియం, ఐరన్, ఫాస్ఫరస్, క్యాల్షియం కూడా సమృద్ధిగా ఉంటాయి. వీటి ద్వారా మన శరీరానికి మంచి పోషకాలు అందుతాయి.
తరచూ సీమ వంకాయలను మన ఆహారంలో భాగం చేసుకుంటే.. యాంటీఆక్సిడెంట్లు, విటమిన్ సి, ఫ్లేవనాయిడ్స్, ఫినోలిక్ సమ్మేళనాలను పొందవచ్చు. ఇవి మన శరీరంలోని ఫ్రీ ర్యాడికల్స్తో పోరాడటానికి సహకరిస్తాయి. దీంతో ఆక్సీకరణ ఒత్తిడి తగ్గి, కణాలకు జరిగే నష్టం పూర్తిగా నియంత్రించబడుతుంది. ముఖ్యంగా క్యాన్సర్, గుండె జబ్బులు, నాడీ సంబంధిత వ్యాధులు వచ్చే అవకాశాలు చాలా వరకు తగ్గుతాయి. సీమ వంకాయల్లో ఉండే ఫ్లేవనాయిడ్స్ రక్త నాళాల్లో కొలెస్ట్రాల్ పేరుకుపోకుండా చూడటంతో.. రక్త నాళాలు ఆరోగ్యంగా ఉంటాయి. అలాగే సీమ వంకాయల్లోని పోషకాలు హార్ట్ ఎటాక్స్ వంటివి రాకుండా అడ్డుకుంటాయి.
సాధారణంగా సీమ వంకాయల్లో పిండి పదార్థాలు తక్కువగా, ఫైబర్ ఎక్కువగా ఉంటుంది. కాబట్టి.. వీటిని తింటే రక్తంలో చక్కెర స్థాయిల వేగం తగ్గుతుంది. ఇది షుగర్ ఉన్నవారికి ఎంతగానో మేలు చేస్తుంది. వీటిని తరచూ మన డైట్లో భాగం చేసుకుంటే.. శరీరం ఇన్సులిన్ను మరింత మెరుగ్గా ఉపయోగించుకుంటుంది. దీంతో షుగర్ లెవల్స్ తగ్గి, డయాబెటిస్ అదుపులో ఉంటుంది. ముఖ్యంగా టైప్-2 డయాబెటిస్ ఉన్నవారికి సీమ వంకాయలు ఎంతగానో మేలు చేస్తాయి. ఈ కూరగాయలోని అధిక ఫైబర్ వల్ల పేగుల్లో మలం సులభంగా కదులుతుంది. దీంతో మలబద్దకం తగ్గుతుంది. సీమ వంకాయలు ప్రీ బయోటిక్ ఆహారంగానూ పనిచేస్తాయి. కాబట్టి.. వీటిని తింటే జీర్ణ సంబంధిత సమస్యలు రాకుండా చూసుకోవచ్చు.
ఈ కూరగాయలో క్యాలరీలు చాలా తక్కువగా, ఫైబర్ అధికంగా ఉంటుంది. వారంలో రెండు లేదా మూడు సార్లు సీమ వంకాయలు తింటే ఎక్కువ సేపు ఆకలి వేయదు. దీంతో ఆహారం తక్కువగా తినవచ్చు. ఈ ప్రక్రియ అంతా బరువు తగ్గేందుకు సహాయ పడుతుంది. ముఖ్యంగా అధిక బరువు ఉన్నవారు సీమ వంకాయలను తరచూ తీసుకుంటే.. బరువును అదుపులో ఉంచుకోవచ్చు. అలాగే సీమ వంకాయలను గర్భిణీ స్త్రీలు తింటే.. ఎంతగానో మేలు జరుగుతుంది. ఈ కాయల్లో ఫోలేట్ అధికంగా ఉండటంతో.. గర్భంలో ఉన్న శిశువు ఎదుగుదలకు సహాయ పడుతుంది. దీనిలోని యాంటీఆక్సిడెంట్ల వల్ల గర్భం దాల్చిన మహిళలకు బలం చేకూరుతుంది.
Share
Tirupati Crime: అత్తింటికి వెళ్లిన అల్లుడిపై పెట్రోల్ పోసి నిప్పంటించిన మామ.. ఇంతకీ ఏం జరిగిందంటే?
Eko movie OTT : మలయాళ మిస్టరీ థ్రిల్లర్ 'ఎకో' స్ట్రీమింగ్ షురూ... ఎప్పుడు, ఎక్కడ చూడవచ్చు అంటే ?
