Breakfast: ప్రొద్దున్నే మనం తినే బ్రేక్ ఫాస్ట్ మన రోజంతా ఉండే శక్తిని మాత్రమే కాదు, మన గుండె ఆరోగ్యాన్ని కూడా నిర్ణయిస్తుంది. చాలా మంది ‘ఆరోగ్యకరమైనవి’ అని భావించే కొన్ని బ్రేక్ ఫాస్ట్ లు నిజానికి రక్తపోటును నిశ్శబ్దంగా పెంచుతాయని కార్డియాలజిస్టులు హెచ్చరిస్తున్నారు. అధిక సోడియం, దాగి ఉన్న చక్కెరలు రక్తనాళాలపై ఒత్తిడి తెచ్చి గుండె జబ్బులకు దారితీస్తాయి. ఆరోగ్యకరమైనవిగా చలామణి అవుతూ మీ బీపీని పెంచే మూడు రకాల ఆహారాల గురించి, వాటికి ప్రత్యామ్నాయాల గురించి ఇప్పుడు తెలుసుకుందాం.
సాధారణంగా మనం బరువు తగ్గడానికో లేదా ఫిట్గా ఉండడానికో కొన్ని రకాల బ్రేక్ ఫాస్ట్ లను ఎంచుకుంటాం. కానీ, ప్యాక్ చేసిన , ప్రాసెస్ చేసిన ఆహారాలలో రుచి కోసం కలిపే పదార్థాలు మన రక్తపోటుపై తీవ్ర ప్రభావం చూపుతాయి. కార్డియాలజిస్టులు హెచ్చరిస్తున్న ఆ మూడు ఆహారాలు ఇవే..
1. ప్యాక్ చేసిన తృణధాన్యాలు:
చాలామంది కార్న్ ఫ్లేక్స్ లేదా ఇతర బ్రాండెడ్ సీరియల్స్ ఆరోగ్యకరమని భావిస్తారు. అయితే.. వీటిలో రుచి కోసం ‘హిడెన్ షుగర్స్’ (దాగి ఉన్న చక్కెరలు) , సోడియం అధికంగా ఉంటాయి. చక్కెర ఎక్కువగా తీసుకోవడం వల్ల శరీరంలో ఇన్సులిన్ పెరిగి, అది రక్తనాళాల పనితీరును దెబ్బతీస్తుంది. తద్వారా రక్తపోటు పెరుగుతుంది.
ప్రత్యామ్నాయం: ప్రాసెస్ చేసిన సీరియల్స్ బదులు ఇంట్లో వండుకున్న ఓట్స్ లేదా రాగులు, జొన్నలతో చేసిన బ్రేక్ ఫాస్ట్ ఎంచుకోండి.
2. ఇన్స్టంట్ ఓట్స్, ఫ్లేవర్డ్ యోగర్ట్ :
ఓట్స్ గుండెకు మంచివే, కానీ ‘ఇన్స్టంట్’ లేదా ‘మసాలా ఓట్స్’ ప్యాకెట్లలో నిల్వ ఉండటానికి ప్రిజర్వేటివ్స్, ఉప్పును అధికంగా కలుపుతారు. అలాగే, పండ్ల రుచితో వచ్చే యోగర్ట్లో కూడా భారీగా చక్కెర ఉంటుంది. ఇవి రక్తంలో గ్లూకోజ్ స్థాయిలను పెంచి, పరోక్షంగా రక్తపోటుపై ఒత్తిడి తెస్తాయి.
ప్రత్యామ్నాయం: ప్లెయిన్ ఓట్స్ తీసుకుని అందులో తాజా పండ్లు లేదా డ్రై ఫ్రూట్స్ కలుపుకోండి. తియ్యటి పెరుగు బదులు ఇంట్లో తోడుపెట్టిన తాజా పెరుగు వాడండి.
3. హోల్ వీట్ బ్రెడ్, సాండ్విచ్లు :
మైదా కంటే గోధుమ బ్రెడ్ మంచిదని మనం నమ్ముతాం. కానీ బ్రెడ్ తయారీలో సాఫ్ట్నెస్ కోసం, నిల్వ ఉండటం కోసం సోడియంను పెద్ద మొత్తంలో ఉపయోగిస్తారు. ఒక్క స్లైస్ బ్రెడ్లోనే మనం ఊహించని స్థాయిలో ఉప్పు ఉంటుంది. దీనికి తోడు మార్కెట్లో దొరికే సాస్లు లేదా పీనట్ బటర్ వంటి స్ప్రెడ్స్ వాడటం వల్ల రక్తపోటు అదుపు తప్పుతుంది.
ప్రత్యామ్నాయం: బ్రెడ్కు బదులుగా ఇంట్లో తయారుచేసిన తక్కువ ఉప్పు ఉన్న ఇడ్లీ, దోశ (పులవని పిండితో) లేదా ఉప్మా వంటివి తీసుకోవడం ఉత్తమం.
Also Read: మీ శరీరంలో విటమిన్ D పెరగాలంటే.. రోజూ ఇలా చేయండి!
అధిక రక్తపోటును అరికట్టడానికి కొన్ని సూచనలు:
లేబుల్స్ చదవండి: ఏవైనా ప్యాక్ చేసిన ఆహారాలు కొనే ముందు ‘Sodium’, ‘Added Sugars’ ఎంత ఉన్నాయో గమనించండి.
పొటాషియం పెంచండి: అరటిపండ్లు, పాలకూర వంటి పొటాషియం అధికంగా ఉన్న ఆహారాలు సోడియం ప్రభావాన్ని తగ్గించి బీపీని అదుపులో ఉంచుతాయి.
సహజ ఆహారానికి ప్రాధాన్యత: ప్రాసెస్ చేసిన ఆహారం కంటే ప్రకృతి సిద్ధంగా దొరికే ఆహారమే గుండెకు మేలు చేస్తుంది.
Share
Allu Arjun- Lokesh : ఏంటయ్యా లోకేషా.. మా బన్నీని ఏం చేస్తున్నావ్..?
Egg: ఎగ్ వైట్ మాత్రమే తింటున్నారా? అయితే మీరు తీవ్రమైన పొరపాటు చేస్తున్నట్లే!
