Rabies From Milk: రేబిస్ అనేది ప్రపంచంలోనే అత్యంత ప్రమాదకరమైన వ్యాధుల్లో ఒకటి. సాధారణంగా పిచ్చి కుక్కలు కరవడం ద్వారా ఈ వైరస్ మనుషులకు సోకుతుందని మనందరికీ తెలుసు. అయితే.. చాలా మందిని వేధించే ఒక ముఖ్యమైన ప్రశ్న.. “రేబిస్ సోకిన ఆవు లేదా గేదె పాలు తాగితే మనకు రేబిస్ వస్తుందా?” దీనికి సంబంధించి శాస్త్రీయ ఆధారాలు, నిపుణుల వివరణలను గురించి ఇప్పుడు తెలుసుకుందాం.
రేబిస్ వైరస్ ఎలా వ్యాపిస్తుంది ?
రేబిస్ వైరస్ ప్రధానంగా జంతువుల లాలాజలంలో ఉంటుంది. జంతువు కరిచినప్పుడు లేదా దాని లాలాజలం మన శరీరంలోని తెరుచుకున్న గాయాలకు తగిలినప్పుడు వైరస్ శరీరంలోకి ప్రవేశిస్తుంది. ఇది నేరుగా నరాల వ్యవస్థపై దాడి చేసి మెదడుకు చేరుకుంటుంది.
పాలు తాగడం వల్ల ప్రమాదం ఉందా ?
వైద్య నిపుణులు, ప్రపంచ ఆరోగ్య సంస్థ నివేదికల ప్రకారం.. రేబిస్ సోకిన జంతువు పాల ద్వారా వ్యాధి సోకే అవకాశం అత్యంత అల్పం. దీనికి కొన్ని ముఖ్యమైన కారణాలు ఉన్నాయి.
వైరస్ సాంద్రత: రేబిస్ వైరస్ పాలలో చాలా తక్కువ పరిమాణంలో ఉంటుంది లేదా అసలు ఉండదు. లాలాజలంతో పోలిస్తే పాలలో వైరస్ ఉండటం చాలా అరుదు.
జీర్ణక్రియ: రేబిస్ వైరస్ కడుపులోని జీర్ణ రసాలకు తట్టుకోలేదు. మనం పాలు తాగినప్పుడు.. ఒక వేళ అందులో వైరస్ ఉన్నా, కడుపులోని ఆమ్లాలు దానిని చంపేస్తాయి.
పాలను మరిగించడం: మన దేశంలో పాలను నేరుగా తాగే అలవాటు తక్కువ. పాలను బాగా మరిగించినప్పుడు లేదా పాశ్చరైజేషన్ చేసినప్పుడు అందులోని వైరస్ పూర్తిగా నశిస్తుంది. వేడికి రేబిస్ వైరస్ అస్సలు తట్టుకోలేదు.
మరి ప్రమాదం ఎక్కడ ఉంది ?
పాలు తాగడం వల్ల నేరుగా ప్రమాదం లేకపోయినప్పటికీ.. కొన్ని సందర్భాల్లో జాగ్రత్తగా ఉండాలి.
పచ్చి పాలు: పాలను మరిగించకుండా నేరుగా తాగడం వల్ల ఇతర బ్యాక్టీరియాలతో పాటు రేబిస్ ముప్పు ఉండే అవకాశం ఉంటుంది.
నోటి గాయాలు: నోటిలో లేదా చిగుళ్లలో తలపులు, గాయాలు ఉన్నప్పుడు పచ్చి పాలు తాగితే.. వైరస్ నేరుగా నరాల ద్వారా ప్రవేశించే అవకాశం ఉంటుందని కొందరు నిపుణులు హెచ్చరిస్తారు.
నిపుణుల సూచనలు:
ఒకవేళ మీరు అనుకోకుండా రేబిస్ సోకిన జంతువు పాలు తాగినట్లయితే.. ఆందోళన చెందాల్సిన అవసరం లేదు. కానీ ఈ కింది జాగ్రత్తలు పాటించడం ఉత్తమం.
పాలను బాగా మరిగించండి: పాలను 100 డిగ్రీల సెల్సియస్ వద్ద మరిగిస్తే వైరస్ చనిపోతుంది.
Also Read: ప్రమాదాన్ని పసిగట్టే ‘సూపర్ సెన్స్’.. గంట ముందే శరీరం ఎలా స్పందిస్తుంది ?
టీకా : మీకు ఇంకా అనుమానం ఉంటే లేదా ఆ జంతువు పాలు తాగినప్పుడు.. మీ నోటిలో పుండ్లు ఉంటే.. వెంటనే డాక్టరును సంప్రదించి ‘పోస్ట్-ఎక్స్పోజర్ ప్రొఫిలాక్సిస్’ టీకా తీసుకోవడం సురక్షితం.
జంతువును గమనించండి: ఆవు లేదా గేదె వింతగా ప్రవర్తిస్తున్నా.. మేత తినకపోయినా, నోటి వెంట నురగలు వస్తున్నా ఆ పాలను వాడకపోవడమే మంచిది.
మరిగించిన పాలు తాగడం ద్వారా రేబిస్ సోకిన దాఖలాలు ఇప్పటివరకు నమోదు కాలేదు. కాబట్టి అనవసరమైన భయాందోళన చెందాల్సిన అవసరం లేదు. అయితే.. ఆరోగ్యకరమైన పశువుల నుంచి వచ్చే పాలను తీసుకోవడం , పాలను ఎల్లప్పుడూ మరిగించి తాగడం అనేది కేవలం రేబిస్ కోసమే కాకుండా.. ఇతర అనేక వ్యాధుల నుంచి మనల్ని రక్షిస్తుంది.
Share
Bhadrachalam: మారుమోగిన భద్రాచలం.. గోదావరిపై స్వామివారి జలవిహారం..లైవ్ వీడియో
Motorola Signature Series: ప్రీమియం ఫోన్ లవర్స్కు శుభవార్త.. ఇండియన్ మార్కెట్లోకి మోటరోలా సిగ్నేచర్ సిరీస్ త్వరలోనే!
