Fear Symptoms: ఎవరు వదిలి వెళ్ళినా తట్టుకోలేకపోతున్నారా? దీని వెనక ఉన్న అసలు కారణాలు ఇవే !

Fear Symptoms: సైకాలజీ ప్రకారం.. ఒక వ్యక్తి తన నుంచి ఆత్మీయులు లేదా ఇష్టమైన వారు వదిలి వెళ్ళిపోతారేమో అని విపరీతంగా భయపడటాన్ని ‘అబాండన్‌మెంట్ ఫియర్’ అంటారు. ఇది ఒక వ్యాధి కాదు. కానీ ఇది ఒక వ్యక్తి యొక్క మానసిక ఆరోగ్యాన్ని, సంబంధాలను తీవ్రంగా దెబ్బతీస్తుంది. సాధారణంగా చిన్నతనంలో జరిగిన చేదు అనుభవాలు లేదా నమ్మక ద్రోహం వల్ల ఈ భయం ఏర్పడుతుంది. భయం ఉన్న వారిలో కనిపించే ముఖ్యమైన సంకేతాలను గురించిన పూర్తి వివరాలను ఇప్పుడు తెలుసుకుందాం.

1. అతిగా అంటిపెట్టుకుని ఉండటం:

ఒక వ్యక్తి తన భాగస్వామి లేదా స్నేహితులు తనను వదిలి వెళ్తారనే భయంతో వారిని నిరంతరం అంటిపెట్టుకుని ఉంటారు. వారు ఎక్కడికి వెళ్లినా వెంటే వెళ్లడం లేదా నిరంతరం మెసేజ్‌లు, కాల్స్ చేస్తూ వారు ఎక్కడ ఉన్నారో తెలుసుకోవాలని ప్రయత్నిస్తారు.

2. పీపుల్ ప్లీజింగ్:

ఎదుటివారు తనను వదిలి వెళ్లకుండా ఉండటం కోసం.. తన సొంత ఇష్టాలను పక్కన పెట్టి అందరినీ సంతోష పెట్టడానికి ప్రయత్నిస్తారు. “నో” (కాదు/వద్దు) అని చెప్పడానికి వీరు చాలా భయపడతారు. ఎవరితో నైనా గొడవ జరిగితే వారు తనను దూరం పెడతారనే.. ఆందోళన వీరిలో ఎక్కువగా ఉంటుంది.

3. సంబంధాల పట్ల అపనమ్మకం:

వీరు మీ భాగస్వామిని లేదా స్నేహితులను త్వరగా నమ్మలేరు. అవతలి వ్యక్తి ప్రేమగా ఉన్నా.. “ఇది ఎప్పటి వరకు ఉంటుంది?”, “నన్ను ఎప్పుడు మోసం చేస్తారో?” అనే సందేహాలతో నిరంతరం బాధపడుతుంటారు. దీని వల్ల చిన్న విషయాలకే గొడవలు లేదా అనుమానాలు మొదలవుతాయి.

4. బంధాలు:

కొందరు వ్యక్తులు ఒంటరిగా ఉండలేక.. ఒక సంబంధం ముగియక ముందే మరొకరితో బంధాన్ని పెంచుకుంటారు. మరికొందరు.. “ఎలాగూ నన్ను వదిలి వెళ్తారు కదా, అసలు ఎవరితోనూ బంధమే వద్దు” అని ఇతరులతో సన్నిహితంగా ఉండటానికి భయపడతారు.

Also Read: పెళ్లి-ఆరోగ్యం.. వైవాహిక బంధం మీ ఆయుష్షును ఎలా పెంచుతుందో తెలుసా?

5. భావోద్వేగాల అస్థిరత:

చిన్నపాటి విమర్శను కూడా వీరు భరించలేరు. ఎదుటి వారు ఏదైనా పనిలో బిజీగా ఉండి రిప్లై ఇవ్వకపోయినా.. వారు తనను నిర్లక్ష్యం చేస్తున్నారని లేదా ఇక తనతో మాట్లాడరని విపరీతంగా ఆందోళన చెందుతారు.

ఈ భయాన్ని ఎలా అధిగమించాలి ?

స్వీయ అవగాహన : ముందుగా ఈ భయం మీలో ఉందని గుర్తించడం మొదటి అడుగు. ఇది గతంలో జరిగిన ఏదైనా సంఘటన వల్ల కలిగి ఉండవచ్చు.

నమ్మకాన్ని నిర్మించుకోవడం: ఎదుటి వ్యక్తులకు కొంత సమయం ఇవ్వడం, మీ ఆందోళనను వారితో ప్రశాంతంగా పంచుకోవడం అలవాటు చేసుకోవాలి.

ఒంటరిగా ఉండటం నేర్చుకోవాలి: ఒంటరితనం అంటే శూన్యం కాదు.. అది మీ గురించి మీరు తెలుసుకునే సమయం అని భావించాలి. మీ సంతోషం కోసం కేవలం ఇతరులపైనే ఆధారపడకూడదు.

ప్రొఫెషనల్ థెరపీ: ఈ భయం మీ జీవితాన్ని ఇబ్బంది పెడుతుంటే.. ఒక సైకాలజిస్ట్‌ను సంప్రదించడం ఉత్తమం. ‘కాగ్నిటివ్ బిహేవియరల్ థెరపీ’ వంటి పద్ధతులు ఈ భయాన్ని పోగొట్టడంలో అద్భుతంగా పనిచేస్తాయి.

ప్రేమించిన వారు మనతోనే ఉండాలని కోరుకోవడం సహజం. కానీ ఆ కోరిక భయంగా మారి మనల్ని.. మన బంధాన్ని ఇబ్బంది పెట్టకూడదు. ఈ భయాన్ని అధిగమించడం వల్ల మరింత ఆరోగ్యకరమైన, బలమైన సంబంధాలను నిర్మించుకోవచ్చు.

Join WhatsApp Channel

Share

• 
• 
• 
• 
• 
•