Mustard Oil For Skin: ఆవ నూనె ఇలా వాడితే.. చలికాలంలో మాయిశ్చరైజర్‌తో పనే లేదు !

Mustard Oil For Skin: చలి కాలంలో మన చర్మానికి అదనపు జాగ్రత్త అవసరం. అందుకే చాలా మంది బాడీ లోషన్‌కు బదులుగా ఆవ నూనెను వాడటానికి ఇష్టపడతారు. ఇది చర్మానికి తగినంత తేమను అందించడమే కాకుండా ఆరోగ్యంగా ఉంచడంలో సహాయ పడుతుంది. అయితే.. ఆవ నూనె కేవలం మాయిశ్చరైజింగ్ కోసం మాత్రమే కాదు.. ఇది అనేక ఔషధ లక్షణాలను కూడా కలిగి ఉంది. కానీ దీనిని సరిగ్గా ఉపయోగించకపోవడం వల్ల చర్మంపై కొన్ని సైడ్ ఎఫెక్ట్స్ వచ్చే ప్రమాదం కూడా ఉంటుంది. అందుకే దీనిని జాగ్రత్తగా ఉపయోగించడం ముఖ్యం.

చలికాలంలో చర్మానికి ఆవ నూనె ఎలా ఉపయోగించాలి ?

1.ఆవనూనె చర్మం పై పొరలను మాత్రమే కాకుండా లోతైన పొరలను కూడా తేమగా చేస్తుంది. దీనిని ఉపయోగించడం వల్ల మీ చర్మం ఎక్కువ సేపు హైడ్రేటెడ్‌గా ఉంటుంది. అంతే కాకుండా ఆవ నూనె చర్మం పొడి బారడాన్ని తగ్గిస్తుంది. చలికాలంలో ఎదురయ్యే పగుళ్ల సమస్యను కూడా ఇది నివారిస్తుంది.

2. సున్నితంగా చర్మంపై ఆవ నూనెతో మసాజ్ చేసినప్పుడు.. ఇది చర్మానికి రక్త ప్రసరణను పెంచుతుంది. ఈ పెరిగిన రక్త ప్రసరణ చర్మ కణాలకు పోషకాలు, ఆక్సిజన్ సరఫరాను మెరుగు పరుస్తుంది. ఫలితంగా ఆరోగ్యకరమైన , మరింత ప్రకాశవంతమైన చర్మం లభిస్తుంది.

3. ఆవ నూనెలోని యాంటీ బాక్టీరియల్ లక్షణాలు చర్మాన్ని బ్యాక్టీరియా నుంచి రక్షిస్తాయి. మొటిమలు లేదా ఇన్ఫెక్షన్ ప్రమాదాన్ని తగ్గిస్తాయి. యాంటీ ఆక్సిడెంట్లు ఫ్రీ రాడికల్స్ వల్ల కలిగే నష్టం నుంచి చర్మాన్ని రక్షిస్తాయి. అంతే కాకుండా వృద్ధాప్య ప్రక్రియను నెమ్మదిస్తాయి.

జాగ్రత్తలు:

1.మీ చర్మం ఏదైనా పదార్థాలకు సులభంగా స్పందించినట్లయితే.. అది ఎరుపు, దురద లేదా దద్దుర్లు కలిగించవచ్చు. కాబట్టి.. ఆవ నూనె చర్మానికి ఉపయోగించేముందు తప్పకుండా ప్యాచ్ టెస్ట్ చేయండి.

2. మంచిదే కదా అని ఆవ నూనె ఎక్కువగా వాడటం వల్ల చర్మం జిగటగా అనిపించవచ్చు. ఇది ముఖ్యంగా జిడ్డ చర్మం ఉన్నవారికి ఇబ్బందికరంగా ఉంటుంది.

3. బయటకు వెళ్ళే ముందు ఆవ నూనె చర్మంపై అప్లై చేస్తే, దుమ్ము లేదా కాలుష్య కణాలను ఆకర్షిస్తుంది. ఇది చర్మంపై బ్యాక్టీరియా పెరగడానికి లేదా చర్మం కొద్దిగా మురికిగా కనిపించేలా చేస్తుంది.