Trump-Biden Debate: నేడే ట్రంప్- బైడెన్ బిగ్ డిబేట్.. నాలుగేళ్లలో తొలిసారి..!

Trump-Biden Debate: అమెరికా అధ్యక్ష ఎన్నికల్లో బరిలో నిలిచిన రాజకీయ ప్రత్యర్థులు జో బైడెన్, డొనాల్డ్ ట్రంప్ ప్రత్యక్ష చర్చా కార్యక్రమానికి సిద్ధమయ్యారు. ఈ మేరకు ఇరువురు కీలక నేతలు గురువారం జరిగే ముఖాముఖి డిబేట్‌లో పాల్గొంటారు. గత ఎన్నికల్లో బైడెన్, ట్రంప్ పరస్పరం పోటీ పడిన సంగతి తెలిసిందే. ఈ సారి కూడా మళ్లీ వారిద్దరూ పోటీలో నిల్చున్నారు. అధ్యక్ష ఎన్నికలకు ముందు అభ్యర్థుల మధ్య ఆనవాయితీగా జరిగే ఈ డిబేట్ పై సర్వత్రా ఉత్కంఠ నెలకొంది.

నవంబర్‌లో అమెరికా అధ్యక్ష ఎన్నికలు జరగనున్నాయి. ఈ ఎన్నికలపై యావత్ ప్రపంచం ఆసక్తిగా ఎదురుచూస్తోంది. ఇప్పటికే ఈ ఇరువురు నేతల ప్రచారం తారాస్థాయికి చేరింది. అయితే అమెరికా అధ్యక్ష పోరులో ఉన్న డెమోక్రటిక్ నేత బైడెన్, రిపబ్లికన్ నేత ట్రంప్..నాలుగేళ్లలో తొలిసారి ముఖాముఖి తలపడనున్నారు.

బైడెన్, ట్రంప్ డిబేట్‌లో ఎలాంటి అంశాలపై చర్చిస్తారనే విషయంపై అందరిలోనూ ఆసక్తి నెలకొంది. ఈ కార్యక్రమం అట్లాంటాలో దాదాపు 90 నిమిషాల పాటు జరగనుంది. ఇందులో చర్చించే అంశాలను టీవీతోపాటు సోషల్ మీడియాలోనూ ప్రసారం కానుంది. అయితే ఈ ప్రోగ్రాంను ప్రతీ 10 మంది అమెరికన్లలో ఆరుగురు చూసేందుకు ఆసక్తిగా ఉన్నట్లు అసోసియేటెడ్ ప్రెస్, ఎన్ఓఆర్సీ పరిశోధన సంస్థ చేపట్టిన సర్వేలో వెల్లడించింది.

Also Read: China expels Ex defence ministers: చైనా కీలక నిర్ణయం, మాజీ రక్షణశాఖ మంత్రులపై బహిష్కరణ వేటు

డెమోక్రటిక్ నేత బైడెన్ విజయానికి ఈ డిబేట్ చాలా ముఖ్యమని 47శాతానికి పైగా అమెరికన్లు భావిస్తుండగా..అంతకంటే ముఖ్యం ట్రంప్‌నకే అని ప్రతీ 10 మందిలో నలుగురు చెబుతున్నట్లు సమాచారం. అయితే ఈ డిబేట్ ఇద్దరికీ ముఖ్యమని 10 మందిలో ముగ్గురు భావిస్తున్నారు.