ATM Free Limit: ఏటీఎంను నెలకు ఎన్నిసార్లు ఫ్రీగా వాడుకోవచ్చో తెలుసా..

ATM Free Limit: దేశంలో డిజిటల్ వినియోగం పెరిగిన తర్వాత క్యాష్ వాడకం భారీగా తగ్గిపోయింది. అయినప్పటికీ అనేక మంది ప్రజలు ఎక్కువగా క్యాష్ అవసరమైనప్పుడల్లా ఏటీఎం కేంద్రాలకు వెళ్లి డ్రా చేస్తుంటారు. ఎప్పుడంటే అప్పుడు కార్డుల ద్వారా నగదను విత్ డ్రా చేసుకుంటారు. కానీ ఇటీవల (మే 1, 2025) అమల్లోకి వచ్చిన కొత్త రూల్స్ ప్రకారం ఎప్పుడంటే అప్పుడు మనీ విత్ డ్రా చేసుకుంటే మాత్రం ఛార్జీల మోత తప్పదు. ఎందుకంటే ఆయా ప్రాంతాలను బట్టి ఏటీఎంల నుంచి క్యాష్ విత్ డ్రా చేసుకునేందుకు పరిమితి ఉంది.

విత్‌డ్రా లిమిట్‌లు
ప్రస్తుత కాలంలో ఏటీఎంలు (ఆటోమేటెడ్ టెల్లర్ మెషిన్స్) ప్రతి ఒక్కరి జీవనంలో ఒక అవసరంగా మారిపోయాయి. నగదు తీసుకోవడం, బ్యాలెన్స్ చెక్ చేయడం, మినీ స్టేట్‌మెంట్ తీసుకోవడం వంటి సేవలకు ఏటీఎంలు 24×7 అందుబాటులో ఉంటాయి. ఇటీవల ఏటీఎం లావాదేవీలపై రిజర్వ్ బ్యాంక్ ఆఫ్ ఇండియా (RBI) నిబంధనలు, ఉచిత లావాదేవీల సంఖ్యను, విత్‌డ్రా లిమిట్‌లను నిర్ణయిస్తాయి. ఈ క్రమంలో హైదరాబాద్, ఢిల్లీ వంటి మెట్రో నగరాల్లో ఏటీఎం ఉచిత లావాదేవీలు, సొంత బ్యాంక్, ఇతర బ్యాంకుల ఏటీఎంల విత్‌డ్రా పరిమితుల గురించి ఇక్కడ తెలుసుకుందాం.

ఉచిత లావాదేవీల పరిమితి
రిజర్వ్ బ్యాంక్ ఆఫ్ ఇండియా (RBI) 2022 జనవరి 1 నుంచి అమలులోకి వచ్చిన నియమాల ప్రకారం, సేవింగ్స్ బ్యాంక్ అకౌంట్ హోల్డర్లకు నెలకు కొన్ని ఉచిత ఏటీఎం లావాదేవీలు ఉంటాయి. ఈ లావాదేవీలు ఫైనాన్షియల్ (నగదు విత్‌డ్రా), నాన్-ఫైనాన్షియల్ (బ్యాలెన్స్ ఎంక్వైరీ, మినీ స్టేట్‌మెంట్) రెండూ కలిపి ఉంటాయి. ఈ నిబంధనలు హైదరాబాద్ వంటి మెట్రో నగరాలు (ముంబై, ఢిల్లీ, చెన్నై, కోల్‌కతా, బెంగళూరు, హైదరాబాద్), నాన్-మెట్రో నగరాల్లో వేర్వేరుగా ఉంటాయి.

సొంత బ్యాంక్ ఏటీఎంలు (ATM Free Limit)
దేశవ్యాప్తంగా అన్ని బ్యాంకులు నెలకు 5 ఉచిత లావాదేవీలను అందిస్తాయి. ఈ లావాదేవీలు ఫైనాన్షియల్, నాన్-ఫైనాన్షియల్ రెండూ కలిపి ఉంటాయి. ఉదాహరణకు స్టేట్ బ్యాంక్ ఆఫ్ ఇండియా (SBI), HDFC, ICICI వంటి బ్యాంకులు ఈ నియమాన్ని అనుసరిస్తాయి.

ఇతర బ్యాంక్ ఏటీఎంలు
మెట్రో నగరాల్లో (హైదరాబాద్, ఢిల్లీ): నెలకు 3 ఉచిత లావాదేవీలు (ఫైనాన్షియల్, నాన్-ఫైనాన్షియల్ కలిపి). మెట్రో కానీ ప్రాంతాల్లో 5 లావాదేవీలు చేసుకోవచ్చు.

ప్రతి అదనపు లావాదేవీకి ఛార్జీలు
ఈ ఉచిత లావాదేవీల పరిమితిని దాటితే, బ్యాంకులు ప్రతి అదనపు లావాదేవీకి ఛార్జీలు విధిస్తాయి. సాధారణంగా ఫైనాన్షియల్ లావాదేవీలకు రూ.21 + GST, నాన్-ఫైనాన్షియల్ లావాదేవీలకు రూ. 8.50 + GST వసూలు చేయబడుతుంది. ఈ ఛార్జీలు 2025 మే 1 నుంచి రూ.23కి పెరిగాయి. ఈ క్రమంలో ఉచిత లావాదేవీలు అయిపోయిన తర్వాత ఒక్కో లావాదేవీకి రూ.23+ GST కలిసి మొత్తం రూ.28 ఛార్జ్ వసూలు చేస్తారు.

సొంత బ్యాంక్ ఏటీఎంలలో విత్‌డ్రా లిమిట్స్
సొంత బ్యాంక్ ఏటీఎంలలో నగదు విత్‌డ్రా లిమిట్ బ్యాంక్, అకౌంట్, డెబిట్ కార్డ్ రకం ఆధారంగా కూడా మారుతుంది.

వీటిలో నెలకు ఏడు
ఇతర బ్యాంక్ ఏటీఎంలలో లావాదేవీలు చేసేటప్పుడు, ఆయా బ్యాంక్‌తో భాగస్వామ్య ఒప్పందాలు చేసుకుని ఉంటే ఉచిత లావాదేవీల సంఖ్య పెరగుతుంది. ఉదాహరణకు, కొన్ని బ్యాంకులు నేషనల్ ఫైనాన్షియల్ స్విచ్ (NFS) ద్వారా భాగస్వామ్య ఏటీఎంలలో అదనపు ఉచిత లావాదేవీలను అందిస్తాయి. సోలో సేవింగ్స్ అకౌంట్ ద్వారా నెలకు 7 ఉచిత లావాదేవీలు (కోటక్ ఏటీఎంలలో) నిర్వహించుకోవచ్చు.