PAN Card 2.0: పాన్ కార్డ్ 2.0కు అప్లై చేశారా లేదా.. ఇలా ఈజీగా చేసుకోవచ్చు..

PAN Card 2.0: దేశంలో ప్రస్తుతం ఆధార్‎తోపాటు పాటు పాన్‎కార్డు కూడా ఒక తప్పనిసరి గుర్తింపు పత్రంగా మారిపోయింది. అయితే అనేక మంది ఇప్పటికీ పాత పాన్‎కార్డులను వినియోగిస్తున్నారు. అలాంటి వారు ఇటీవల ఆదాయపు పన్ను శాఖ ప్రవేశపెట్టిన కొత్త PAN 2.0 కోసం అప్లై చేసుకోవాలని అధికారులు సూచిస్తున్నారు. ఇది మునుపటి దాని కంటే మరింత సురక్షితమైనదని, అధునాతన సాంకేతిక లక్షణాలతో కూడి ఉందని చెబుతున్నారు. కొత్త పాన్ కార్డులో QR కోడ్ ద్వారా సమాచారాన్ని ధృవీకరించుకునేందుకు అవకాశం ఉంటుంది. దీంతోపాటు స్కామర్లు వీటి నకిలీని తయారు చేయడం కూడా అంత ఈజీ కాదని అంటున్నారు. అయితే పాత కార్డుకు బదులు, కొత్త పాన్ కార్డ్ కోసం ఎలా అప్లై చేసుకోవాలి, అసలు పాన్ కార్డు లేని వారు ఏం చాయాలనే విషయాలను ఇక్కడ తెలుసుకుందాం.

కొత్త పాన్ ‎కార్డ్ 2.0 స్పెషల్ ఏంటి

పాన్ 2.0: అనేది పాత పాన్‎ కార్డ్ అప్‌గ్రేడ్ వెర్షన్. ఇది కామన్ బిజినెస్ ఐడెంటిఫైయర్ మిషన్ కింద ప్రారంభించబడింది. దీనికి అనేక కొత్త లక్షణాలు ఉన్నాయి.

QR కోడ్ టెక్నాలజీ: ఇది పాన్‎ కార్డ్ హోల్డర్ పేరు, పాన్ నంబర్ వంటి వివరాలను స్కాన్ చేయడం ద్వారా ధృవీకరించడానికి సహాయపడుతుంది.

అధునాతన భద్రతా ప్రోటోకాల్‌: ఇది పాన్‎కార్డ్ మోసం, ఆదాయపు పన్ను ఎగవేతను నిరోధించడంలో ఉపయోగపడుతుంది.

చిరునామా రుజువు: ఇప్పుడు దీనిని గుర్తింపు కార్డు లేదా చిరునామా రుజువుగా కూడా వినియోగించుకోవచ్చు.

పాన్ 2.0కు ఎలా అప్లై చేయాలంటే

ఇప్పటికే పాన్‎కార్డ్ ఉన్న వారు కొత్త పాన్ పొందడానికి మళ్లీ అప్లై చేసుకోకుండానే పాన్ 2.0కు మారవచ్చు. దీని కోసం కొత్త క్యూఆర్ కోడ్ ఎన్ బుల్డ్ వెర్షన్ కోసం అప్లై చేయాలి. దీని కోసం ఎలాంటి రుసుము చెల్లించాల్సిన అవసరం లేదు. కానీ కొత్తగా పాన్ కార్డ్ కోసం అప్లై చేసేవారు మాత్రం రూ. 50 చెల్లించాల్సి ఉంటుంది. దీంతోపాటు కొత్తగా దరఖాస్తు చేసుకునేవారు వారి గుర్తింపు కార్డు, అడ్రస్, పుట్టిన తేదీ ధృవపత్రాలను అప్ లోడ్ చేయాల్సి ఉంటుంది.

కొత్త పాన్ కార్డ్ కోసం ఎలా అప్లై చేయాలంటే..

ముందుగా NSDL లేదా UTIITSL వెబ్‌సైట్‌కు వెళ్లండి
“New PAN” ఎంపికను సెలక్ట్ చేయండి
ఫారం 49A అప్లికేషన్ లో మీ వివరాలు పూరించండి
అవసరమైన పత్రాలను అప్‌లోడ్ చేయండి (AADHAAR, గుర్తింపు, చిరునామా సాక్ష్యాలు)
(రూ. 50) చెల్లింపు చేయండి
ఆ తర్వాత దరఖాస్తు సమర్పించండి
15 నుంచి 20 రోజుల్లో కొత్త పాన్ కార్డు మీ చిరునామాకు పంపిస్తారు

కొత్త పాన్ కార్డు తీసుకోకపోతే

మీరు ఇంకా కొత్త పాన్ కార్డు తీసుకోకపోతే, భవిష్యత్తులో అనేక ఇబ్బందులను ఎదుర్కొవాల్సి ఉంటుంది
పాత పాన్ కార్డును ఎప్పుడైనా చెల్లనిదిగా ప్రకటించవచ్చు
ఆదాయపు పన్ను రిటర్నులు దాఖలు చేయడంలో సమస్యలు రావచ్చు
బ్యాంకు రుణం, క్రెడిట్ కార్డు కోసం దరఖాస్తు చేసుకోవడం లేదా విదేశాలకు వెళ్లడం వంటి ప్రధాన ఆర్థిక లావాదేవీలకు ఆటంకం ఏర్పడవచ్చు
ప్రభుత్వ పథకాలు, సబ్సిడీల ప్రయోజనాలు రాకపోవడం వంటివి

మీరు ఇంకా కొత్త పాన్ కార్డు తీసుకోకపోతే, వీలైనంత త్వరగా దీని కోసం అప్లై చేయండి. మీ ఆర్థిక కార్యకలాపాలను సులభతరం చేసుకోవడమే కాకుండా మోసాల నుంచి మిమ్మల్ని మీరు రక్షించుకోవచ్చు.