TDP 44th Celebrations: తెలుగుదేశం పార్టీ 43 వసంతాలు పూర్తిచేసుకుంది. అయితే ఈసారి వేడుక కేవలం పండుగలా మాత్రమే కాదు.. ఒక సరికొత్త చరిత్రకు వేదికైంది. ‘కార్యకర్తే పార్టీకి ప్రాణం’ అనే మాటకు నిలువెత్తు నిదర్శనంగా.. సరికొత్త హంగులతో, సరికొత్త ఒరవడితో టీడీపీ ఆవిర్భావ దినోత్సవం అంబరాన్నంటింది!
రాజకీయాలంటేనే పదవులు.. పదవులంటేనే ప్రోటోకాల్. కానీ తెలుగుదేశం పార్టీ 44వ ఆవిర్భావ వేడుకల్లో ఆ ప్రోటోకాల్ గోడలు బద్దలయ్యాయి. ఎప్పుడూ వేదికల మీద నాయకులు, కింద కార్యకర్తలు ఉండటం చూశాం. కానీ ఈ సారి సీన్ రివర్స్ అయింది. అరుదైన దృశ్యం ఆవిష్కృతమైంది. పార్టీ కోసం చెమటోడ్చిన సామాన్య కార్యకర్తలకు పెద్ద పీట వేస్తూ.. వారిని సభా వేదికపై సగర్వంగా కూర్చోబెట్టింది అధిష్టానం. సీనియర్ నాయకులు కింద సభికుల్లో కూర్చుని కార్యకర్తలకు గౌరవాన్ని అందించడం ఈ సభకే హైలెట్‌గా నిలిచింది. అలా మొత్తం 19 మంది సామాన్య సైనికులు.. టీడీపీ జాతీయ అధ్యక్షులు చంద్రబాబుతో కలిసి వేదికను పంచుకోవడం ఒక సరికొత్త చరిత్రకు నాంది పలికింది.
పార్టీ కార్యక్రమాల్లో చురుగ్గా పాల్గొన్న వారు.. కష్టకాలంలో జెండా మోసిన వారు.. గత ప్రభుత్వ వేధింపులను తట్టుకుని నిలబడిన ధీరులు.. ఇలా ఎంపిక చేసిన 19 మంది సామాన్య కార్యకర్తలను వేదికపైకి ఆహ్వానించింది టీడీపీ నాయకత్వం. తాము పడ్డ కష్టాలను, పార్టీపై తమకున్న మక్కువను వారు భావోద్వేగంతో వివరిస్తుంటే.. సభ ప్రాంగణం చప్పట్లతో మారుమోగిపోయింది. “కార్యకర్తే అధినేత” అనే నినాదాన్ని నూటికి నూరు పాళ్లు నిజం చేసిన పార్టీ టీడీపీనే అంటూ వారు గర్వంగా చాటిచెప్పారు. ఈ సభకు మరో ప్రత్యేక ఆకర్షణ.. యువ నాయకత్వం. సభ నిర్వహణ బాధ్యతలను యువ ఎమ్మెల్సీ కావలి గ్రీష్మకు అప్పగించడం ద్వారా పార్టీ భవిష్యత్తు వారసులకు ఎంత ప్రాధాన్యం ఇస్తుందో స్పష్టమైంది. చకచకా సాగిన కార్యక్రమం, యువత ఉత్సాహం వెరసి సభకు ఒక ఫ్రెష్ లుక్‌ని తీసుకొచ్చింది.
ఎన్నో ఇబ్బందులు పడి, పార్టీ కోసం అహర్నిశలు శ్రమించిన ఆ కార్యకర్తలు.. సాక్షాత్తూ అధినేత నారా చంద్రబాబు నాయుడు పక్కనే ఆసీనులవ్వడం.. తెలుగుదేశం చరిత్రలో సువర్ణాక్షరాలతో లిఖించదగ్గ ఘట్టం అన్నారు నారా లోకేష్. కార్యకర్తల కష్టానికి దక్కిన అసలైన గౌరవం ఇది అని చెప్పారు. సీనియర్ల అనుభవం.. యువత ఆలోచన.. కార్యకర్తల అంకితభావం.. ఈ మూడింటి కలయికతో టీడీపీ ఆవిర్భావ వేడుకలు ఒక కొత్త ఆశను, నూతనోత్తేజాన్ని నింపాయి. కార్యకర్తలను గుండెల్లో పెట్టుకునే పార్టీగా టీడీపీ మరోసారి తన ప్రత్యేకతను చాటుకుంది అంటున్నారు. రాబోయే కాలంలో ఈ జోష్ పార్టీని మరిన్ని విజయాల వైపు నడిపించబోతోంది అని కేడర్ ధీమా వ్యక్తం చేస్తున్నది.
Also Read: గన్ సైగలు.. నోటి దురద.. పాడి కౌశిక్ రెడ్డి పొలిటికల్ కెరీర్ క్లోజ్ అయినట్టేనా?
Story by: Apparao, Big Tv
Share
బలమైన ఆహారమే.. కానీ మీ కిడ్నీలకు శాపంగా మారే అవకాశం! మినప్పప్పు వెనక ఉన్న చేదు నిజం
మా అమ్మను వారి సంరక్షణలో వదిలి వచ్చాను.. రాహుల్ గాంధీ ఎమోషనల్
