కియా సోరెంటో హైబ్రిడ్ టెస్టింగ్ షురూ, లాంచింగ్ ఎప్పుడో తెలుసా?

Kia Sorento Test Mule Spotted: భారతీయ మార్కెట్‌ లోకి సరికొత్త ప్రీమియం ఎస్‌యూవీ అడుగు పెట్టబోతోంది. కియా సోరెంట్ హైబ్రిడ్ వెర్షన్ త్వరలోనే విడుదల కాబోతోంది. తాజాగా ఈ కారు రోడ్ టెస్టింగ్ కు సంబంధించిన స్పై షాట్స్ సోషల్ మీడియాలో వైరల్ అయ్యాయి. ఇంతకు ముందు ఈ మోడల్ కేవలం ఓ ప్రదేశంలో నిలిపి ఉంచిన ఫోటో కనిపించగా, ఇప్పుడు రియల్ రోడ్ టెస్టింగ్ ప్రారంభమవడంతో, విడుదలకు ముందు స్పీడ్ టెస్ట్ జరుగుతోందని అర్థమవుతోంది.

కేమోఫ్లాజ్‌తో కప్పబడి ఉన్నప్పటికీ..

హైవేలపై కనిపించిన టెస్ట్ వెహికల్ పూర్తిగా కేమోఫ్లాజ్‌ తో కప్పబడి ఉన్నప్పటికీ, దాని ఆకారం, పరిమాణం చూసినప్పుడు సోరెంటోనే అని అర్థం అవుతోంది. డిజైన్‌ లో నిటారుగా ఉండే బాడీ, పెద్ద సైజ్, పొడవైన వీల్‌ బేస్ లాంటి లక్షణాలు కనిపిస్తున్నాయి. ఇవి ఈ ఎస్‌యూవీకి రోడ్డుపై బలమైన ప్రెజెన్స్ ను అందిస్తున్నాయి.

ఇక పక్కనుంచి చూస్తే, పెద్ద అల్లాయ్ వీల్స్, బాడీ క్లాడింగ్ లాంటి అంశాలు కనిపిస్తున్నాయి. వెనుక భాగం కూడా పెద్దగా ఉండేలా రూపొందించారు. టెయిల్ ల్యాంప్‌ లు పూర్తిగా కనిపించకపోయినా, గ్లోబల్ మోడల్ తరహాలో లేటెస్ట్ ఎల్ఈడి లైటింగ్‌ తో ఉండే అవకాశముంది. మొత్తంగా, ఈ వాహనం భారతీయ రహదారులకు అనుగుణంగా పరీక్షలు జరుగుతున్నట్లు తెలుస్తోంది.

ఈ కొత్త మోడల్ ఏ రేంజ్ లో ఉంటుందంటే?

ఈ కొత్తకారు విడుదలైన తర్వాత, భారత్ లో కియా కంపెనీ లైనప్‌ లో ఉన్న సెల్టోస్, కేరెన్స్ కంటే పై స్థాయిలో ఉంటుంది. ఇది మూడు వరుసల సీటింగ్‌ తో వచ్చే ఫ్యామిలీ ఎస్‌యూవీగా అందుబాటులోకి రానుంది. సుమారు 4.8 మీటర్ల పొడవు కలిగిన ఈ మోడల్, ప్రస్తుతం టయోటా ఇన్నోవా హైక్రాస్ లాంటి వాహనాలు ఉన్న సెగ్మెంట్‌ లో గట్టి పోటీ ఇవ్వనుంది.

హైబ్రిడ్ టెక్నాలజీతో ఉంటుందా?

ఈ కొత్త మోడల్‌ లో హైబ్రిడ్ టెక్నాలజీ ఉండే అవకాశం ఎక్కువగా ఉంది. గతంలో వెల్లడైన వివరాల ప్రకారం, టెస్ట్ యూనిట్‌ లో రోటరీ గేర్ సెలెక్టర్ ఉండటం కనిపించింది. ఇది హైబ్రిడ్ వేరియంట్ అయి ఉండొచ్చని సూచిస్తోంది. అంతర్జాతీయ మార్కెట్లలో సోరెంటో పెట్రోల్, టర్బో పెట్రోల్, హైబ్రిడ్ ఆప్షన్లతో లభిస్తుంది. భారత్ లో మాత్రం ఇంధన సామర్థ్యాన్ని దృష్టిలో ఉంచుకుని హైబ్రిడ్ మోడల్‌ కు ప్రాధాన్యం ఇచ్చే అవకాశం ఉంది.

ధర ఎంత ఉంటుందంటే?

తయారీ విషయంలో కూడా కియా ప్రత్యేక వ్యూహం అనుసరిస్తోంది. ఈ ఎస్‌యూవీని దేశంలోనే తయారు చేయాలని కంపెనీ భావిస్తున్నట్లు సమాచారం. ఆంధ్రప్రదేశ్‌లోని అనంతపూర్ ప్లాంట్‌లో ఉత్పత్తి చేయడం వల్ల ధరను పోటీ స్థాయిలో ఉంచే అవకాశం ఉంది. అంచనా ప్రకారం దీని ధర రూ. 30 లక్షల నుంచి 40 లక్షల మధ్య ఉండవచ్చు. ప్రస్తుతం టెస్టింగ్ దశలో ఉన్న ఈ ఎస్‌యూవీ, 2026 చివరి నాటికి భారత మార్కెట్‌లోకి రావచ్చని భావిస్తున్నారు. త్వరలోనే దీని ఫీచర్లు, డిజైన్, ఇంజిన్ ఎంపికలపై పూర్తి వివరాలు వెల్లడయ్యే అవకాశం ఉంది.