కియా సోనెట్‌ కు షాక్.. క్రాష్ టెస్టులో మరీ ఇంత ఘోరమా?

Kia Sonet Global NCAP Crash Test: దేశంలో తయారయ్యే కియా సోనెట్ SUV తాజాగా గ్లోబల్ NCAP క్రాష్ టెస్ట్‌ లో పాల్గొంది. అయితే, ఈ పరీక్షలో సోనెట్ ఆశించిన స్థాయిలో ఫలితాలు సాధించలేకపోయింది. అడల్ట్ ప్యాసింజర్స్ భద్రత విభాగంలో కేవలం 1-స్టార్ రేటింగ్ మాత్రమే పొందగా, పిల్లల భద్రత విభాగంలో 3 స్టార్ రేటింగ్ సాధించింది.

ఈ కారు ఇండియాలో నో సేల్!

తాజాగా క్రాష్ టెస్ట్ చేసిన సోనెట్ భారత మార్కెట్‌ లో అమ్ముతున్న మోడల్ కాదు. దక్షిణాఫ్రికా మార్కెట్ కోసం భారత్ లో తయారు చేసిన వెర్షన్. ఈ మోడల్‌ లో కేవలం రెండు ఎయిర్‌ బ్యాగ్‌లు మాత్రమే ఉన్నాయి. అలాగే ఎలక్ట్రానిక్ స్టెబిలిటీ కంట్రోల్ కూడా స్టాండర్డ్ ఫీచర్‌ గా ఇవ్వలేదు. అయితే, దేశంలో అమ్మే కియా సోనెట్‌ లో ఆరు ఎయిర్‌ బ్యాగ్‌ లు, ESC స్టాండర్డ్‌ గా అందుబాటులో ఉన్నాయి. అందువల్ల ఈ 1-స్టార్ రేటింగ్‌ ను భారత మోడల్‌ కు నేరుగా అన్వయించలేమని నిపుణులు చెబుతున్నారు.

అడల్ట్ భద్రతలో జస్ట్ 21.29 పాయింట్లు

అడల్ట్ భద్రత పరీక్షలో సోనెట్ 34 పాయింట్లకు గాను 21.29 పాయింట్లు సాధించింది. ఫ్రంటల్ క్రాష్ టెస్ట్‌ లో డ్రైవర్, ముందు ప్రయాణికుడి తల, మెడ ప్రాంతాలకు మంచి రక్షణ లభించినట్లు గ్లోబల్ NCAP తెలిపింది. అయితే ఛాతీ, కాళ్లు, మోకాళ్ల ప్రాంతాల్లో రక్షణ స్థాయి సంతృప్తికరంగా లేదని తెలిపింది. ముఖ్యంగా డ్రైవర్ పాదాలకు రక్షణ బలహీనంగా ఉన్నట్లు గుర్తించింది. సైడ్ ఇంపాక్ట్ పరీక్షలో తల, నడుము భాగాలకు మంచి రక్షణ లభించినప్పటికీ, ఛాతీ భాగానికి రక్షణ తక్కువగా ఉన్నట్లు వెల్లడించింది. అలాగే కర్టెన్ ఎయిర్‌ బ్యాగ్‌ లు లేకపోవడం వల్ల సైడ్ పోల్ ఇంపాక్ట్ టెస్ట్ నిర్వహించలేదు.

గ్లోబల్ NCAP నివేదిక ప్రకారం, సోనెట్‌ లోని ఫుట్‌ వెల్ ప్రాంతం, బాడీషెల్ నిర్మాణం పూర్తిగా స్థిరంగా లేదని తేలింది. ప్రమాద సమయంలో ఇవి మరింత లోడును తట్టుకునే స్థాయిలో లేవని పరీక్షలో వెల్లడైంది. అలాగే డ్రైవర్ సీటుకు మాత్రమే సీట్‌ బెల్ట్ రిమైండర్ ఉండటం కూడా ప్రతికూల అంశంగా గుర్తించారు.

పిల్లల భద్రతలో 28.57 పాయింట్లు

పిల్లల భద్రత విభాగంలో సోనెట్ 49 పాయింట్లకు గాను 28.57 పాయింట్లు సాధించి 3 స్టార్ రేటింగ్ పొందింది. 18 నెలల నుంచి 3 సంవత్సరాల వయస్సు గల పిల్లల కోసం ఉపయోగించే డమ్మీలతో నిర్వహించిన పరీక్షల్లో మంచి ఫలితాలు వచ్చాయి. అయితే వెనుక మధ్య సీటులో ల్యాప్ బెల్ట్ మాత్రమే ఉండటం, అలాగే కొన్ని అదనపు భద్రతా సదుపాయాలు లేకపోవడం వల్ల పాయింట్లు కోల్పోయింది.

కియా సోనెట్‌ కు పోటీ కార్లు ఇవే!

భారత మార్కెట్లో కియా సోనెట్‌కు టాటా నెక్సాన్, మహీంద్రా XUV 3XO, హ్యుందాయ్ వెన్యూ, స్కోడా కైలాక్, నిస్సాన్ మాగ్నైట్ వంటి SUVలు పోటీగా ఉన్నాయి. వీటిలో టాటా నెక్సాన్, నిస్సాన్ మాగ్నైట్ గ్లోబల్ NCAPలో 5-స్టార్ రేటింగ్ సాధించాయి. భారత్ NCAP పరీక్షల్లో XUV 3XO, వెన్యూ, సైరోస్, కైలాక్ కూడా 5 స్టార్ భద్రతా రేటింగ్ పొందాయి. భారత మార్కెట్లో అమ్ముతున్న కియా సోనెట్‌ లో అదనపు భద్రతా ఫీచర్లు ఉండటంతో, ఈ గ్లోబల్ NCAP ఫలితాలను నేరుగా భారత మోడల్‌ తో పోల్చడం సరైనది కాదని ఆటో నిపుణులు చెప్తున్నారు.