టాటా To మహీంద్రా.. మేలో అమ్మకాల్లో దుమ్మురేపిన టాప్ ఎలక్ట్రిక్ కార్లు ఇవే!

Top Selling Electric Cars in May 2026: భారత్ లో ఎలక్ట్రిక్ కార్ల మార్కెట్ రోజు రోజుకు వేగంగా విస్తరిస్తోంది. పెరుగుతున్న ఇంధన ధరలు, ప్రభుత్వ ప్రోత్సాహకాలు, పర్యావరణంపై అవగాహన పెరగడం లాంటి కారణాలతో ప్రజలు ఎలక్ట్రిక్ వాహనాల వైపు మొగ్గు చూపుతున్నారు. ఈ ఎఫెక్ట్ 2026 మే అమ్మకాల గణాంకాల్లో స్పష్టంగా కనిపించింది. మే 2026లో దేశవ్యాప్తంగా మొత్తం 26,620 ఎలక్ట్రిక్ ప్యాసింజర్ వాహనాలు అమ్ముడయ్యాయి. ఏప్రిల్ నెలలో ఈ సంఖ్య 24,592 యూనిట్లుగా ఉండగా, మేలో దాదాపు 8 శాతం వృద్ధి నమోదైంది. భారతీయ ఈవీ మార్కెట్ ఎంత బలంగా విస్తరిస్తుందో ఈ లెక్కలు చూపిస్తున్నాయి.

1.టాటా పంచ్ ఈవీ

మే నెలలో టాటా పంచ్ ఈవీ దేశంలో అత్యధికంగా అమ్ముడైన ఎలక్ట్రిక్ కారుగా గుర్తింపు తెచ్చుకుంది. మే నెలలో ఈ కారు 3,681 యూనిట్లు అమ్ముడయ్యాయి. ఏప్రిల్‌ తో పోలిస్తే ఇది 14 శాతం పెరుగుదల. అందుబాటు ధర, మంచి రేంజ్, ఎస్‌యూవీ తరహా డిజైన్ ఈ కారుకు భారీ డిమాండ్ తీసుకొచ్చాయి.

2.మహీంద్రా 9ఎస్

రెండో స్థానంలో మహీంద్రా 9ఎస్ నిలిచింది. ఈ మోడల్ మే నెలలో 3,502 యూనిట్లను విక్రయించింది. ఏప్రిల్‌ తో పోలిస్తే అమ్మకాలు 8 శాతం పెరిగాయి. మహీంద్రా ఎలక్ట్రిక్ వాహనాల విభాగంలో వేగంగా ఎదుగుతున్న కంపెనీలలో ఒకటిగా మారుతోంది.

3.టాటా నెక్సాన్ ఈవీ

టాటా నెక్సాన్ ఈవీ తన ప్రజాదరణను కొనసాగిస్తోంది. మే నెలలో ఈ కారు 2,649 యూనిట్ల అమ్మకాలతో మూడో స్థానంలో నిలిచింది. గత నెలతో పోలిస్తే 6 శాతం వృద్ధి సాధించింది.

4.ఎంజీ విండ్సర్

నాలుగో స్థానంలో ఎంజీ విండ్సర్ నిలిచింది. ఈ కారు 2,032 యూనిట్లు అమ్ముడైనా, ఏప్రిల్‌తో పోలిస్తే అమ్మకాలు 38 శాతం తగ్గాయి. ఇది టాప్ మోడళ్లలో అత్యధిక తగ్గింపుగా చెప్పుకోవచ్చు.

5.మహీంద్రా XEV 9e

ఐదో స్థానంలో మహీంద్రా XEV 9e నిలిచింది. ఈ మోడల్ 1,939 యూనిట్ల అమ్మకాలతో 20 శాతం వృద్ధిని నమోదు చేసింది. మహీంద్రాకు చెందిన పలు ఎలక్ట్రిక్ మోడళ్లు ప్రస్తుతం మంచి డిమాండ్‌ను సొంతం చేసుకుంటున్నాయి.

6.టాటా హారియర్ ఈవీ

టాటా హారియర్ ఈవీ కూడా మంచి సత్తా చాటింది. ఈ కారు 1,833 యూనిట్ల అమ్మకాలతో ఆరవ స్థానంలో నిలిచింది. కంపెనీ ప్రీమియం ఎలక్ట్రిక్ ఎస్‌యూవీ విభాగంలో తన స్థాయిని మరింత బలోపేతం చేసుకుంది.

7.ఎంజీ జెడ్ఎస్ ఈవీ

ఎంజీ జెడ్ఎస్ ఈవీ అమ్మకాల్లో భారీ వృద్ధిని నమోదు చేసింది. ఈ కారు మే నెలలో 1,562 యూనిట్లు అమ్ముడై, గత నెలతో పోలిస్తే 118 శాతం పెరుగుదల సాధించింది. ఇది మే నెలలో అత్యధిక వృద్ధిని నమోదు చేసిన మోడల్‌గా నిలిచింది.