డుకాటి To హార్లీ.. ఇండియాలో అత్యంత ఖరీదైన 5 బైక్స్ ఇవే!

Top 5 Most Expensive Motorcycles: ఇండియన్ టూ వీలర్ బైక్స్ మార్కెట్‌ లో ఇప్పుఉ సాధారణ బైక్‌ లే కాదు.. ప్రపంచ స్థాయి సూపర్‌ బైక్‌ లు, లగ్జరీ టూరింగ్ మోటార్‌ సైకిళ్లు అందుబాటులో ఉన్నాయి. హై పర్ఫార్మెన్స్, అత్యాధునిక సాంకేతికత, ప్రీమియం డిజైన్ కోరుకునే కొనుగోలుదారుల కోసం పలు అంతర్జాతీయ బ్రాండ్లు అత్యంత ఖరీదైన మోడళ్లను భారత మార్కెట్లో విక్రయిస్తున్నాయి. కొన్ని బైక్‌ ల ధరలు రూ. 80 లక్షలకు పైగానే ఉండటం విశేషం. ప్రస్తుతం ఇండియాలో అందుబాటులో ఉన్న అత్యంత ఖరీదైన బైక్స్ గురించి ఇప్పుడు తెలుసుకుందాం..

1.డుకాటి పానిగాలే V4 R – రూ. 84.99 లక్షలు

ప్రస్తుతం దేశంలో లభిస్తున్న అత్యంత ఖరీదైన మోటార్‌ సైకిల్ డుకాటి పానిగాలే V4 R. ఇది 998 సీసీ ఇంజిన్‌ తో వస్తుంది. డుకాటి రేసింగ్ ఎక్స్ పీరియెన్స్ ను అందించేలా ఈ బైక్‌ ను రూపొందించారు. తేలికైన ఫ్రేమ్, అధునాతన సస్పెన్షన్, ఆకర్షణీయమైన ఏరోడైనమిక్ డిజైన్ ఈ బైక్ ప్రత్యేకతలు. ట్రాక్‌ పై అత్యుత్తమ పనితీరు కోరుకునే రైడర్లకు ఇది ప్రత్యేకంగా నచ్చుతుంది.

2.హార్లీ డేవిడ్సన్ CVO రోడ్ గ్లైడ్ – రూ. 67.36 లక్షలు

అమెరికన్ బ్రాండ్ హార్లీ డేవిడ్సన్‌ కు చెందిన CVO రోడ్ గ్లైడ్ లగ్జరీ టూరింగ్ సెగ్మెంట్‌ లో ప్రత్యేక స్థానం కలిగి ఉంది. ఇందులో 1.9 లీటర్ భారీ ఇంజిన్ ఉంటుంది. సుదూర ప్రయాణాల కోసం రూపొందించిన ఈ బైక్‌ లో సౌకర్యవంతమైన సీట్లు, పెద్ద ఫెయిరింగ్, స్థిరమైన రైడింగ్ ఎక్స్ పీరియెన్స్ లభిస్తాయి. హైవేలపై సుదూర ప్రయాణాలను ఇష్టపడేవారికి అద్భుతమైన ఆప్షన్ గా చెప్పుకోవచ్చు.

3.BMW M 1000 RR – రూ. 55 లక్షలు

BMW M 1000 RR ట్రాక్ ఫోకస్డ్ సూపర్‌ బైక్. 999 సీసీ ఇంజిన్‌ తో వచ్చే ఈ బైక్ వేగం, హ్యాండ్లింగ్ పరంగా మంచి గుర్తింపు పొందింది. రేసింగ్ టెక్నాలజీ ఆధారంగా రూపొందించిన ఈ మోడల్‌ లో ఏరోడైనమిక్ వింగ్‌ లెట్స్, తక్కువ బరువు, అధునాతన ఎలక్ట్రానిక్ సిస్టమ్స్ ఉన్నాయి. ట్రాక్‌ లోనూ, రోడ్డుపైనూ అద్భుతంగా దూసుకెళ్తుంది.

4.హోండా గోల్డ్ వింగ్ టూర్ – రూ. 43.12 లక్షలు

లాంగ్ టూరింగ్ బైక్‌ లలో హోండా గోల్డ్ వింగ్ టూర్‌ కు ప్రత్యేక గుర్తింపు ఉంది. 1.8 లీటర్ ఆరు సిలిండర్ల ఇంజిన్‌ తో ఇది వస్తుంది. ఏడు స్పీడ్ ఆటోమేటిక్ ట్రాన్స్‌ మిషన్, విశాలమైన సీటింగ్, మంచి సౌకర్యంతో అందుబాటులో ఉంది. వందల కిలోమీటర్ల ప్రయాణం చేసినా అలసట తక్కువగా ఉండేలా దీనిని రూపొందించారు.

5.కవాసకి నింజా ZX-10R – రూ. 20.79 లక్షలు

కవాసకి నింజా ZX-10R పూర్తి స్థాయి సూపర్‌ బైక్. 998 సీసీ ఇంజిన్‌ తో వచ్చే ఈ మోడల్ BS6 నిబంధనలకు అనుగుణంగా అప్‌ డేట్ చేశారు. లాంచ్ కంట్రోల్, కార్నరింగ్ మేనేజ్‌ మెంట్, ట్రాక్షన్ కంట్రోల్ లాంటి అధునాతన ఫీచర్లు ఇందులో ఉన్నాయి. పనితీరు పరంగా అత్యంత ప్రజాదరణ పొందిన సూపర్‌ బైక్‌ లలో ఒకటిగా కొనసాగుతోంది.