కాంకోర్డ్ ఫ్లైట్ స్టైల్‌ లో BMW కొత్త K 18 బైక్.. వారెవ్వా ఏముంది భయ్యా!

BMW Vision K 18 Touring Bike Concept: లేక్ కోమోలో జరిగిన ప్రతిష్టాత్మకమైన కాంకోర్సో డి ఎలెగాంజా విల్లా డి ఎస్టే ఈవెంట్‌ లో BMW మోటోరాడ్ కొత్త కాన్సెప్ట్ బైక్ విజన్ K 18ను ప్రపంచానికి పరిచయం చేసింది. ఈ బైక్ సాధారణ టూరింగ్ మోటార్‌ సైకిళ్లలా కాకుండా, ఫ్యూచరిస్టిక్ డిజైన్‌ తో రూపొందించింది. ముఖ్యంగా ఇందులో ఉపయోగించిన భారీ 1,800cc ఇన్‌లైన్ సిక్స్ ఇంజన్ ఈ కాన్సెప్ట్‌ కు ప్రధాన ఆకర్షణగా నిలిచింది.

సూపర్‌ సోనిక్ విమానం BAC కాంకోర్డ్ స్పూర్తితో..

ఈ కాన్సెప్ట్ డిజైన్‌ కు ప్రసిద్ధ సూపర్‌ సోనిక్ విమానం BAC కాంకోర్డ్ నుంచి స్ఫూర్తి పొందినట్లు BMW వెల్లడించింది. అందుకే ఈ బైక్ చాలా పొడవుగా, సన్నగా కనిపించే ప్రత్యేకమైన లుక్ ను కలిగి ఉన్నట్లు చెప్పింది. ఈ బైక్ ముందు భాగం నుంచి వెనుక వరకు ఏరోడైనమిక్ స్టైల్‌ లో తీర్చిదిద్దారు. చూసే వారికి ఇది రోడ్డు మీద నడిచే ఫ్యూచరిస్టిక్ మెషీన్ లా కనిపిస్తుంది.

ఆరు సిలిండర్ల ఇంజన్‌ హైలైట్

విజన్ K 18లోని డిజైన్ ఎలిమెంట్స్ కూడా ప్రత్యేకంగా ఆకట్టుకుంటాయి. ఆరు సిలిండర్ల ఇంజన్‌ను హైలైట్ చేయడానికి ఇందులో ఆరు LED లైట్ ఎలిమెంట్స్, ఆరు ఎయిర్ ఇన్‌ టేక్ ట్యూబ్స్, అలాగే ఆరు ఎగ్జాస్ట్ అవుట్‌ లెట్స్‌ ను ఇచ్చారు. ఇవి బైక్‌ కు మరింత అగ్రెసివ్, ప్రీమియం లుక్‌ ను తీసుకొచ్చాయి. బాడీ ప్యానెల్స్‌ ను చేతితో తయారు చేసిన అల్యూమినియంతో రూపొందించగా, కొన్ని భాగాల్లో ఫోర్జ్డ్ కార్బన్ మెటీరియల్‌ ను ఉపయోగించారు. దీంతో బైక్‌ తక్కువ బరువు, ఎక్కువ బలం కలిగి ఉంటుంది.

భవిష్యత్‌లో BMW మోడల్స్ అన్నీ ఈ డిజైన్ తోనే..

సస్పెన్షన్ సెటప్ కూడా ఈ కాన్సెప్ట్‌ లో ప్రత్యేకంగా ఉంది. హైడ్రాలిక్ అడ్జస్ట్మెంట్ సిస్టమ్ ద్వారా రైడింగ్ అవసరాలకు అనుగుణంగా సస్పెన్షన్‌ ను మార్చుకునే అవకాశం ఉంటుంది. దీని వల్ల హై స్పీడ్ రైడింగ్ సమయంలో మరింత స్టెబులిటీ లభించే అవకాశం ఉంది. ప్రస్తుతం BMW దగ్గర ఉన్న ఇన్‌ లైన్ సిక్స్ టూరింగ్ బైక్స్ ఎక్కువగా సౌకర్యవంతమైన ప్రయాణాల కోసం తయారయ్యాయి. కానీ, విజన్ K 18 మాత్రం పూర్తిగా పర్ఫార్మెన్స్, స్టైల్, ఫ్యూచరిస్టిక్ డిజైన్‌ పై దృష్టి పెట్టింది. ఇది ఇంకా కాన్సెప్ట్ దశలోనే ఉన్నప్పటికీ, భవిష్యత్‌లో BMW విడుదల చేసే కొత్త ఇన్‌ లైన్ సిక్స్ మోటార్‌ సైకిళ్ల డిజైన్‌ పై దీని ప్రభావం ఉండొచ్చని ఆటోమొబైల్ నిపుణులు అంచనా వేస్తున్నారు.

విజన్ K 18 కాన్సెప్ట్ ద్వారా BMW మోటోరాడ్ తన సాంకేతిక నైపుణ్యాన్ని, డిజైన్‌ లో కొత్త ఆలోచనలను మరోసారి చూపించింది. ఈ బైక్ భవిష్యత్ టూరింగ్ బైక్స్ ఎలా ఉండబోతున్నాయో ముందుగానే చూపించే ఒక గ్లింప్స్‌ లా కనిపిస్తోంది.