ఇది స్కూటరా? లేక టూరింగ్ మెషీనా? ప్రత్యేకతలు తెలిస్తే పరేషాన్ కావాల్సిందే!

భారతీయ మార్కెట్లో ప్రీమియం టూవీలర్స్ కు డిమాండ్ పెరుగుతున్న నేపథ్యంలో BMW అదిరిపోయే స్కూటర్ ను తీసుకొచ్చింది. C 400 GT పేరుతో మ్యాక్సీ స్కూటర్ ను పరిచయం చేసింది. సిటీ ప్రయాణాలతో పాటు లాంగ్ రైడ్స్‌ ను కూడా సౌకర్యవంతంగా మార్చేలా ఈ స్కూటర్‌ ను రూపొందించారు. అత్యాధునిక టెక్నాలజీ, శక్తివంతమైన ఇంజిన్, అత్యుత్తమ కంఫర్ట్ ఫీచర్లతో సాధారణ స్కూటర్లకు భిన్నమైన అనుభూతిని అందిస్తుంది.

BMW C 400 GT ఇంజిన్ గురించి..

BMW C 400 GTలో 350cc సామర్థ్యం కలిగిన లిక్విడ్ కూల్డ్, సింగిల్ సిలిండర్ ఇంజిన్‌ ఉంటుంది. ఈ ఇంజిన్ గరిష్టంగా 34 హెచ్‌పీ పవర్, 35 ఎన్ఎమ్ టార్క్‌ ను ఉత్పత్తి చేస్తుంది. సిటీ ట్రాఫిక్‌ లో సులభంగా నడవడంతో పాటు హైవేపై కూడా మంచి పని తీరును అందిస్తుంది. స్కూటర్‌ లో CVT గేర్‌ బాక్స్ ఉండటంతో గేర్ మార్చాల్సిన అవసరం లేకుండా స్మూత్ రైడింగ్ చేసే అవకాశం ఉంటుంది.

అత్యాధునిక భద్రతా ఫీచర్లు

భద్రత విషయంలో BMW కీలక ఫీచర్లు తీసుకొచ్చింది. ముందు భాగంలో డబుల్ డిస్క్ బ్రేకులు, వెనుక భాగంలో సింగిల్ డిస్క్ బ్రేక్‌ ను అందించారు. అదనంగా ABS Pro, డైనమిక్ ట్రాక్షన్ కంట్రోల్, ఇంజిన్ డ్రాగ్ టార్క్ కంట్రోల్ లాంటి అధునాతన సేఫ్టీ ఫీచర్లు కూడా ఇందులో ఉన్నాయి. ఇవి స్కూటర్‌ పై కంట్రోల్ ను మరింత పెంచుతాయి.

స్టైలిష్ డిజైన్

డిజైన్ పరంగా BMW C 400 GT చాలా స్టైలిష్‌ గా కనిపిస్తుంది. మ్యాక్సీ స్కూటర్‌ కు ప్రత్యేకమైన భారీ బాడీ, ఆకట్టుకునే ఫ్రంట్ డిజైన్ దీనికి ప్రీమియం లుక్‌ ను అందిస్తాయి. పొడవైన విండ్‌ స్క్రీన్ ఉండటం వల్ల హైవే రైడింగ్ సమయంలో గాలి ఒత్తిడి తగ్గుతుంది. సుదూర ప్రయాణాలు మరింత సౌకర్యవంతంగా మారతాయి. రైడర్ సౌకర్యాన్ని దృష్టిలో పెట్టుకుని విశాలమైన సీటును అందించారు. ఇంటి గ్రేటెడ్ బ్యాక్‌ రెస్ట్ ఉండటం వల్ల ఎక్కువ సేపు ప్రయాణించినా అలసట తక్కువగా ఉంటుంది. పెద్ద ఫుట్‌బోర్డ్ ఉండటంతో రైడర్ తన కాళ్లను సౌకర్యవంతంగా ఉంచుకోవచ్చు.

అత్యాధునిక టెక్నాలజీ

టెక్నాలజీ పరంగా కూడా ఈ స్కూటర్ ప్రత్యేకంగా నిలుస్తుంది. ఇందులో BMW కనెక్టివిటీ ప్రోతో కూడిన 10.25 అంగుళాల TFT డిస్‌ ప్లే అందించారు. నావిగేషన్, కాల్స్, వాహన సమాచారం లాంటి వివరాలను ఈ స్క్రీన్ ద్వారా సులభంగా చూడవచ్చు. USB-C ఛార్జింగ్ పోర్ట్‌ తో పాటు ముందు భాగంలో స్టోరేజ్ కంపార్ట్‌ మెంట్ కూడా ఉంది. సీటు కింద BMW ఫ్లెక్స్‌ కేస్ స్టోరేజ్ సిస్టమ్‌ ను అందించింది. ఇది అవసరానికి అనుగుణంగా పెంచుకునేలా ఉంటుంది. రోజువారీ అవసరాలకు అనుగుణంగా ఉంటుంది.