Two Wheeler Tyres: BKT నుంచి సరికొత్త టూవీలర్ టైర్లు లాంచ్, వీటి ప్రత్యేకత ఏంటో తెలుసా?

BKT Two Wheeler Tyres Unveiled: భారతీయ టైర్ల తయారీ సంస్థ బాలకృష్ణ ఇండస్ట్రీస్ లిమిటెడ్ సరికొత్త టైర్లను అందుబాటులోకి తీసుకొచ్చింది. ఇప్పటి వరకు పెద్ద వాహనాలకు సంబంధించిన ఈ సంస్థ ఇప్పుడు దేశీయ టూ వీలర్ టైర్ల విభాగంలోకి అధికారికంగా ప్రకటించింది. తాజాగా BKT సంస్థ జెనోవా, థైరోస్ పేరుతో రెండు రకాల టూ వీలర్ టైర్లను లాంచ్ చేసింది. వాస్తవానికి BKT భారీ మైనింగ్ ట్రక్కులపై ఉపయోగించే ఆఫ్ హైవే టైర్ల తయారీకి ప్రసిద్ధి చెందింది. ఈ కంపెనీ ఇప్పుడు టూవీలర్ మార్కెట్లోకి ప్రవేశించడంతో కొత్త అధ్యాయాన్ని మొదలుపెట్టినట్లు అయ్యింది.

BKT కొత్త టూవీలర్ టైర్ల గురించి..

BKT తాజాగా తీసుకొచ్చిన జెనోవా టైర్లను ప్రధానంగా పట్టణ ప్రయాణికుల కోసం అభివృద్ధి చేసింది. ఈ టైర్ ట్రాఫిక్‌ లో మంచి స్థిరత్వం, అద్భుతమైన బ్రేకింగ్ పనితీరు, అన్ని రకాల రోడ్డు పరిస్థితులను అనుకూలంగా ఉండటంతో పాటు దీర్ఘకాలిక మన్నిక అందించే లక్ష్యంతో వీటిని రూపొందించినట్లు కంపెనీ ప్రకటించింది.

అటు, BKT థైరోస్ టైర్లను గుంతలతో కూడిన రోడ్లతో పాటు రహదారుల మీద ఎలాంటి ఇబ్బంది లేకుండా ప్రయాణించేలా తయారు చేసినట్లు కంపెనీ వెల్లడించింది. ఈ టైర్లు ఆన్, ఆఫ్ రోడ్ ఉపయోగం కోసం ఉద్దేశించబడ్డాయి. ఇవి నగర పరిమితులను దాటి ప్రయాణించే వారికి, గతుకుల రోడ్లతో పాటు కఠినమైన ప్రాంతాల్లో ప్రయాణించే వాహనదారులకు అనుకూలంగా ఉంటాయి. BKT తాజాగా లాంచ్ చేసిన రెండు టైర్ లైన్లు భారత్ లోనే తయారు చేయబడ్డాయి. ఈ మోడల్స్ బైక్స్, స్కూటర్ విభాగాలకు ఉపయోగపడుతాయి.

ఇండోర్ లో టైర్ల పరీక్షలు పూర్తి

BKT తాజాగా తీసుకొచ్చిన రెండు రకాల టైర్లకు సంబంధించి ఇండోర్‌ లో ఉన్న ప్రభుత్వ పరీక్షా కేంద్రం NATRAXలో వెహికిల్ లెవెల్ ట్రయల్స్‌ తో సహా టైర్లు విస్తృతమైన ధ్రువీకరణకు సంబంధించిన పరీక్షలు పూర్తయ్యాయని కంపెనీ వెల్లడించింది. ఈ పరీక్షలలో తడి, పొడి బ్రేకింగ్ అసెస్‌మెంట్లు, రైడ్ క్వాలిటీ ఎవల్యూషన్, హ్యాండ్లింగ్ పర్ఫార్మెన్స్ తనిఖీలు నిర్వహించారు. ఈ పరీక్షలు అన్నింటిలో తమ కంపెనీ టైర్లు పాస్ అయినట్లు తెలిపింది. అంతేకాదు, వీటికి BIS సర్టిఫికేషన్ లభించినట్లు వివరించింది. ఈ రెండు రకాల టైర్లు భారతీయ నియంత్రణ ప్రమాణాలకు అనుగుణంగా ఉన్నాయని NATRAX నిర్థారించినట్లు BKT తెలిపింది. తమ కంపెనీ ఇకపై కొత్త అధ్యయాన్ని మొదలు పెట్టబోతున్నట్లు ప్రకటించింది.