ఇది ఆటోనా.. మినీ బస్సా? బజాజ్ కొత్త డబుల్ డెక్కర్ డిజైన్ చూస్తే మతిపోవాల్సిందే!

Bajaj Double Decker Auto Goes Viral: ఇటీవల సోషల్ మీడియాలో ఓ క్రేజీ ఆటోరిక్షా అందరి దృష్టిని ఆకర్షిస్తోంది. ఇది సాధారణ షేర్ ఆటోలా కాకుండా, డబుల్ డెక్కర్ డిజైన్‌ తో రూపొందించిన ప్రత్యేక కాన్సెప్ట్ వెహికల్. బజాజ్‌కు చెందిన ఈ డిజైన్ అని ప్రచారం జరుగుతుండటంతో నెటిజన్లలో ఆసక్తి మరింత పెరిగింది.

ఏంటీ ఆటో ప్రత్యేకత?

ఈ ఆటోలో సుమారు 15 మంది ప్రయాణించేలా రూపొందిస్తున్నట్లు తెలుస్తోంది. అంతేకాదు, ప్రయాణికుల సౌకర్యం కోసం ఎయిర్ కండీషనింగ్ కూడా ఏర్పాటు చేసినట్లు చెబుతున్నారు. దీని అంచనా ధర సుమారు రూ.4.3 లక్షలుగా ప్రచారం జరుగుతోంది. అయితే, ఈ వివరాలు ప్రస్తుతం సోషల్ మీడియాలో వైరల్ అవుతున్నా. కంపెనీ ఎలాంటి అధికారిక ప్రకటన చేయలేదు.

రెండు అంతస్తుల్లో ఆటో నిర్మాణం

ఈ డబుల్ డెక్కర్ ఆటోలో ప్రధాన ఆకర్షణ దాని ప్రత్యేకమైన నిర్మాణం. కింద ఒక అంతస్తు, పైన మరో అంతస్తు ఉండేలా దీనిని డిజైన్ చేసినట్లు కనిపిస్తోంది. సాధారణ ఆటోతో పోలిస్తే ఒకేసారి ఎక్కువ మంది ప్రయాణికులను తీసుకెళ్లే అవకాశం ఉంటుంది. ముఖ్యంగా రద్దీ ఎక్కువగా ఉండే నగరాల్లో ఇలాంటి వాహనాలు ఉపయోగపడతాయని పలువురు కామెంట్స్ చేస్తున్నారు. ప్రస్తుతం చాలా నగరాల్లో షేర్ ఆటోలు ప్రజా రవాణాలో కీలక పాత్ర పోషిస్తున్నాయి. తక్కువ ఖర్చుతో ఎక్కువ మందిని గమ్యస్థానాలకు చేర్చడంలో ఎంతో ఉపయోగపడుతున్నాయి. అలాంటి సమయంలో డబుల్ డెక్కర్ ఆటో లాంటి కొత్త ఆలోచన ముందుకు రావడంతో జోరుగా చర్చ మొదలైంది.

15 सीटर वातानुकूलित डबल डेकर शेयर ऑटो की कीमत लगभग 4.3 लाख है बजाज द्वारा

15 Seater Air Conditioned Double Decker Share Auto Priced Around ₹ 4.3 Lakh by Bajaj pic.twitter.com/gFOdEyPKqt

— Dhananjay Kadam (@dsk4u) July 5, 2026

నెటిజన్లు ఏమంటున్నారంటే?

కొంతమంది ఈ వాహనాన్ని భవిష్యత్ పట్టణ రవాణాకు మంచి పరిష్కారంగా చూస్తున్నారు. రోడ్లపై స్థలం తక్కువగా ఉన్న ప్రాంతాల్లో కూడా ఒకే వాహనంలో ఎక్కువ మంది ప్రయాణించే అవకాశం ఉంటే ట్రాఫిక్ సమస్య కొంతవరకు తగ్గుతుందని వారు భావిస్తున్నారు. మరోవైపు ప్రయాణికులకు ఏసీ సౌకర్యం కల్పించడం కూడా అదనపు ఆకర్షణగా మారింది. మరికొందరు మాత్రం ఈ డిజైన్ నిజంగా రోడ్లపై నడవడానికి అనుకూలంగా ఉంటుందా? భద్రతా ప్రమాణాలు ఎలా ఉంటాయి? మలుపులు తిరిగేటప్పుడు, రద్దీ రోడ్లలో ఎంత వరకు సురక్షితంగా ఉంటుంది? లాంటి ప్రశ్నలు లేవనెత్తుతున్నారు. ఇలాంటి వాహనాన్ని వాస్తవంగా ప్రజా రవాణాలో ప్రవేశపెట్టాలంటే అనేక భద్రతా పరీక్షలు, ప్రభుత్వ అనుమతులు అవసరమని నిపుణులు చెబుతున్నారు.

సోషల్ మీడియాలో వీడియో వైరల్

ప్రస్తుతం ఈ డబుల్ డెక్కర్ ఆటోకు సంబంధించిన ఫొటోలు, వీడియోలు సోషల్ మీడియాలో వేగంగా వైరల్ అవుతున్నాయి. వాటిని చూసి ఆశ్చర్యం వ్యక్తం చేస్తుండగా, మరికొందరు సరదాగా స్పందిస్తున్నారు. ఇంకొందరు మాత్రం ఇలాంటి వాహనం నిజంగా అందుబాటులోకి వస్తే తప్పకుండా ప్రయాణిస్తామని కామెంట్లు చేస్తున్నారు. మొత్తంగా ఈ డబుల్ డెక్కర్ ఆటో కాన్సెప్ట్ ప్రజల్లో ఆసక్తిని రేకెత్తించింది. భవిష్యత్తులో నిజంగా రోడ్లపై కనిపిస్తుందా? లేదా? అనేది పక్కన పెడితే, కొత్త ఆలోచనలతో ప్రజా రవాణాను మరింత సౌకర్యవంతంగా మార్చాలనే ప్రయత్నాలపై చర్చకు మాత్రం దారితీసింది.